Prezidente Repúblika (PR), Francisco Guterres ‘Lú Olo’ husu ba VIII Governu konstitusional no partidu opozisaun iha Parlamentu Nasional atu iha relasaun konstrutiva tuir prinsipiu, valor no regras konstitusionais.
“Demokrasia hakoak diferensia polítika. Demokrasia la funsiona bainhira laiha opozisaun, nune’e importante fó valor ba knaar opozisaun ninian iha prosesu hametin ita-nia demokrasia. Governu no opozisaun tenki iha relasaun konstrutiva ne’ebé hatuur tuir prinsipius, valores no regras konstitusionais ba ita-nia interese nasional,”PR Lú Olo liu husi ninia diskursu hafoin toma de pose ba membru VIII Governu konstitusional nain 28, iha Palasiu Nobre, Lahane, Díli, Sesta (22-06-2018).
Nia akresenta, biar iha hanoin oin seluk, maibé nuudar PR fiar katak partidu hotu-hotu no sosiedade tomak simu ho laran luak prioridades ba dezenvolvimentu nasional.
“Ha’u fiar ba faktu diak ida ne’e tanba susesu dezenvolvimentu nasional ninian, la’os depende de’it husi Governu, maibé husi mós partisipasaun konstrutiva husi opozisaun, instituisaun sira no sosiedade em jeral.
PR Lú Olo propoin mós dezafiu ida ba VIII Governu, atu loke debate kona-bá polítika dezenvolvimentu atu haforsa soberania nasional, liu husi dezenvolvimentu sosial no ekonómiku.
“Ita tenki hatama iha debate ida ne’e, oinsa ita mobiliza ita-nia ema atu partisipa no haksesuk kona-bá sá polítika no oinsa implementa polítika sira ne’e, atu hadia moris diak, iha nivel hotu-hotu, inklui iha nivel dezenvolvimentu lokal,”sujere PR ba VIII Governu.
Tuir planu membru VIII Governu 30 mak simu tomada de posse iha loron dahuluk nian. Maibe infelismente la atinji númeru ne’e tamba Kay Rala Xanana Gusmão, ne’ebé sei assume kargu hanesan Ministru Estadu Konselleiru Primeiru Minitru no Alfredo Pires, ne’ebé sei assume kargu hanesan Ministru Petroleu no Minerais, la marka prezensa.ves
