Prezidente Parlamentu Nasionál (PPN), Arão Noe Amaral, relata, deputadu V lejislatura presiza hatama inisiativa ba lei foun, tanba lei hirak ne’ebé kaduka iha III to’o IV lejislatura suspende hotu.
“Lei pendente sira ne’e kaduka tiha ona, agora lei laiha. Tanba tuir ita-nia sistema lejislatura, mandatu ida tinan lima, Parlamentu IV lejislatura mós mandatu hotu tiha ona, III lejislatura mós hotu tiha ona, lei sira ne’ebé tama iha III lejislatura ne’e kaduka tiha ona, entaun Governu ne’ebé proponente mak tenke halo proposta foun hodi submete fali mai,”esplika Arão Noe ba jornalista iha Parlamentu Nasional, Kuarta (20/06/2018).
Líder orgaun lejislador ne’e afirma, bainhira deputadu V lejislatura mak iha inisiativa halo projetu lei hodi aprezenta ba meja Parlamentu, maibe presiza asinatura foun husi deputadu rekerente sira.
“Se insiativa ne’e husi deputadu sira, liu hosi projetu lei, entaun deputadu sira tenke halo asina foun, hatama fali mai hanesan projetu lei, foin bele iha lei. Maibe agora ita laiha lei ida iha meja leten Parlamentu nian,”dehan tan Arão Noe.
Antes ne’e, deputadu sira husi bankada PLP no KHUNTO promete, atu aselera lei anti korupsaun, hodi reforsa Komisaun Anti Korupsaun (KAK) nia servisu, atu halakon Korupsaun Koluzaun no Nepotizmu (KKN) iha Timor-Leste, nu’udar moras aat ida, hodi fo oportunidade ba dezenvolvimentu atu haburas rai, nu’udar mós ezijensia ne’ebé públiku hein hela durante tinan barak ona.
Iha mandate III lejislatura la konsege diskute no aprova lei Anti korupasaun, poder lokal no lei seluk tan, no kaduka ba IV lejislatura, maibe iha IV lejislatura la konsege hatama projetu lei ruma husi deputadu sira inklui husi VII Governu, tanba mosu impasse polítika entre bankada governasaun no opozisaun iha Parlamentu Nasionál.Say
