Prezidenti Repúblika (PR), Francisco Guterres Lú Olo mesak labele nomeia no ezonera Xefi Estadu Maior General Forsa Armadas (XEMGFA), Maijor Jeneral Lere Anan Timur no Vise-Xefi Estadu Maior General Forsa Armada (XEMGFA), Brigadeiru Jeneral Filomeno Paixão de Jesus.
Xefi Kaza Sivíl Prezidenti Repúblika, Francisco Maria de Vasconselhos hato’o asuntu ne’e liuhusi konferensia imprensa iha Palásiu Prezidensial bairu Pite Díli, Kuarta (27/6) ne’e.
“Kona-ba pedidu ezonerasaun ba Vise-Xefi Estadu Maior General Forsa Armada (XEMGFA), Brigadeiru Jeneral Filomeno Paixão de Jesus, ne’e tuir Konstituisaun no ukun ne’ebé ita hakruuk ba. Pedidu ne’e bele tatoli mai tuir proposta Governu liu-tiha hala’o sorumutu ho Konsellu Superior Defeza no Seguransa. Poder atu nomeia no ezonera Xefi Estadu Maior General Forsa Armadas (XEMGFA) no Vise-Xefi Estadu Maior General Forsa Armada (XEMGFA) mak poder ida ne’ebé Prezidenti fahe ho Governu. Prezidenti mesak de’it labele ezonera XEMGFA no Vise-XEMGFA,” Francisco de Vasconselhos esplika.
Antes ne’e, Xefi Estadu Maior FALINTIL-Forsa Defeza Timor-Leste, Major Jeneral Lere Anan Timur aprezenta ona karta rezignasaun Vise Xefi Estadu Maior, Brigadeiru Jeneral Filomeno Paixão, husi ninia kargu ba Prezidenti Repúblika Francisco Guterres Lú Olo.
Lere Anan Timur mós aseita karta ne’ebé maka Primeiru Ministru Indizitadu, Taur Matan Ruak husu Vise Xefi Estadu Maior F-FDTL Brigadeiru Jeneral Filomeno Paixão ba Ministru Defeza (MD) iha VIII Governu konstistusionál.ías
