Prezidente Parlamentu Nasionál (PPN), Arão Noe Amaral, hatete, Deputadu V lejislatura, liu hosi reuniaun líder bankada Sesta (29/06/2018), koloka ona ajenda ba sesaun plenária ba semana oin hodi deside membru ba Konsellu Estadu (KE) no Konsellu Seguransa (KS) nian.
Líder másimu segundu orgaun soberanu ne’e informa tan, alende ajenda rua ne’e, inklui mós ajenda seluk ne’ebé sei deside deputadu balun, hodi reprezenta Parlamentu Timor-Leste ba partisipa reuaniun entre nasaun CPLP ne’ebé sei hala’o iha tempu badak.
“Ajenda ba semana oin nian, primeiru atu eleje membru ba konsellu estadu na’in 5, ba reprezenta Parlamentu Nasionál iha konsellu de estadu, nune’e mós atu hili kandidatu membru ba konsellu seguransa nasionál, deputadu nain 3 ba reprezenta iha konsellu superior defeza no seguransa nian, aleinde ne’e mós atu hili membro permanentes nain 6 ho suplente nain 6, husi deputadu sira, atu ba partisipa iha enkontru CPLP nian, nu’udar reprezentante Parlamentu nian,”relata Arão Noe.
Eis xefi bankada CNRT ne’e eskalarese tan, ajenda prioridade ba semana mak tolu ne’e, maibe iha reuaniaun líder bankada Sesta-Feira ne’e mós, deside ajenda atu realiza plenária extraordinária ida iha Sábadu ohin, hodi fo votus pezar ba matebian eis deputadu bankada CNRT, Cecílio Caminha.Say
