Foto: google
Defensor Públiku Jeral, Sergio da Costa Hornai, fo hanoin ba Timor-oan hotu atu respeita servisu Prezidente Repúblika (PR) Francisco Guterres ‘LuOlo’ nian, tanba lei fó dalan ba Prezidenti Repúblika atu halo fiskalizasaun aspeitu polítika no jurídika husi proposta Primeiru Ministru nian
“Nu’udar sidadaun ida, ita hotu tenki respeita ba Prezidenti Repúblika nia servisu, mai husi itania Governu rasik hanesan Primeiru Ministru, iha plena poder atu aprezenta proposta ba lista kandidatu sira. Prezidenti Repúblika mós iha kompetensia atu uza nia direitu prerogativu atu halo fiskalizasaun ba buat balu, maibé husi perspetiva polítika no jurídika nian, karik iha relevansia,”tenik Sergio Hornai, Sergio da Costa Hornai, esplika ba jornalista sira iha Parlamentu Nasional, semana kotuk ne’e.
Hatan kona-ba jurista balun hateten katak, laiha lei ida ne’ebé fó dalan ba Prezidenti Repúblika atu rejeita lista ne’ebé Primeiru Ministru aprezenta, Sergio da Costa Hornai hateten, jurista rua kuandu hasoru malu, nunka iha solusaun.
“Ita hotu tenki respeita, tanba doutrina no konseitu interpretasaun ba artigu ida ho ninia barealidade, entaun jurista kuandu barak liu, interpretasaun mós nunka bele hotu. Ita nia konstituisaun no lei sira mós fó fatin katak, bainhira ema ruma la satisfas, iha ninia dalan proprio atu to’o iha ne’eba,” afirma Sergio Hornai.
Nia dehan, Prezidente Repúblikaiha kompetensia atu uza nia direitu prerogativa hodi halo fiskalizasaun ba proposta Primeiru Ministru, Taur Matan Ruak, kona-ba membru VIII Governu.
Maibé Sergio Hornai dehan, konstituisaun RDTL no lei sira mós fó dalan katak, bainhira ema ruma la satisfas, iha ninia dalan propriu atu hakotu problema ne’e.GMN
