Vise Primeira-Ministra ba Assuntu Sosial, Armanda Berta dos Santos, hateten, uma-kain 23.000 iha Rejiaun Administrativa Espesial Oecusse Ambeno (RAEOA) iha loron ikus fulan juñu ne’e sei simu subsídiu USD 100.00 husi Governu.
Armanda Berta esplika orsamentu ba pagamentu subsídiu dólar atus ida ba kada família bazeia ba dadus agregadu família iha Rejiaun Administrativa Espesial Oecusse Ambeno. Ministra ne’e mós haktuir katak durante pagamentu iha RAEOA ekipa MSSI sei tun direta hodi ajuda Autoridade Rejiaun Oecusse.
“Ba Rejiaun Administrativo Espesial Oecusse Ambeno nian Presidente Autoridade RAEOA horsehik mos hasoru hau para bele haree processu pagamento iha tempo badak ne’ebe dala ruma iha fim de juñu ne’e bele halo pagamento iha ne’eba. Processo la’o hela, tuir dados ne’ebe mai husi Ministério Administrasaun Estatal uma kain hamutuk 23.000”, hateten Armanda Berta iha Palásio Governo hafoin hasoru malu ho Primeiro-Ministro tersa(16-06).
Tuir dadus Ministériu Solidariedade Sosiál no Inklusaun to’o loron 15 fulan juñu ne’e família 148 875 ou 50% husi total uma kain iha munisípiu 12 mak simu ona subsídiu dolár atus ida ba fulan rua nian. Enkuantu RAEOA total uma kain 23.000 mak iha prosesu preparasaun dokumentu no posibilidade pagamentu sei hahú iha loron ikus fulan Juñu tinan ida ne’e.
Rekoñese pagamentu subsídiu la’o tarde
Vise Primeira Ministra ba Assuntu Solidariedade Sosiál, Armanda Berta dos Santos, rekoñese pagamentu ba subsídiu dólar atus ida ba kada família la’o tarde tamba falta preparasaun husi ekipa Ministériu Solidariedade Sosial no Inkluzaun.
“Pagamento Agregado la’o tarde tamba buat hotu ita tenki prepara buat, lubuk ida ekipa tenki iha preparasaun ne’ebe diak para bele pagamentu mos bele la’o ho diak, tamba ida ne’e maka atrasa dunik, maibe importante maka dólar atus ida ne’e bele to’o ba iha ita nia uma kain sira”, hateten Armanda Berta dos Santos Tersa(16-06) hafoin hasoru malu ho Primeiru-Ministru, Taur Matan Ruak, hodi relata progresso pagamento subsídio dólar 100 aba kada uma kain iha Timor-Leste, iha ámbitu surtu COVID 19
Relasiona ho preokupasaun públiku konaba perdiem ba ekipa fahe subsídiu dólar 100 ba kada uma kain , iha loron ida hetan dólar 40, Armanda Berta, hateten montante ne’e bazeia ba diploma ministerial ne’ebé MSSI hasai ona.
“Konaba perdiem buat sira ne’e hotu iha hela ema nia direito nia merese dunik atu simu tamba ida ne’e maka halo, maibe parte tekniku sira ne’e ita la to’o iha ne’eba importante maka usa buat sira ne’e ho diak no tuir nia dalan. Hau senti iha ne’eba ne’e pagamento ita haree ba loron ne’ebe maka hatur tia ona iha orário buat sira ne’e hotu. Tamba ida ne’e maka buat ne’ebe maka halo iha terreno ne’e, tuir área tekniku nian, sira sei kumpri ida ne’e, se karik ita nia ema sira maka barak to’o ida ne’e atu oinsa maka halo esforsu atu bele halo hotu”
Tuir dadus Ministériu Solidariedade Sosiál no Inklusaun to’o loron 15 fulan juñu ne’e família 148 875 ou 50% husi total uma kain iha munisípiu 12 mak simu ona subsídiu dolár atus ida ba fulan rua nian. Enkuantu RAEOA total uma kain 23.000 mak iha prosesu preparasaun dokumentu no posibilidade pagamentu sei hahú iha loron ikus fulan Juñu tinan ida ne’e.oct
