Governo fo ona apoiu orsamentu ho montante USD millaun 1 resin ba família rihun neen (6) resin (6.875) iha Díli no mos munisipi lima (5) iha kosta sul no parte leste ne’ebé sai vítima ba inundasaun iha tinan ne’e.
Primeiro Ministru (PM), Taur Matan Ruak, Segunda ne’e, lidera reuniaun komisaun interministerial hodi fo resposta ba impaktu dezastre naturais ne’ebé mosu iha Timor-Leste iha fulan hirak liu ba.
Iha enkontru ne’e Sekretáriu Estadu Protesaun Sívil, Alexandrino de Araujo, halo aprezentasaun ba dadus relasiona ho resposta governu nian ba inundasaun sira ne’ebé akontese iha Díli no mos iha munisipiu 5 iha kosta sul no parte leste nian.
Alénde ne’e, Ministru Administrasaun Estatal (MAE), Miguel Carvalho, hanesan koordenador ba komisaun interministerial halo balansu ba apoiu sira ne’ebé fo ona ba vítima dezastre natural sira ne’ebé akontese iha Timor-Leste.
“Relasionadu ho inundasaun sira ne’ebé akontese iha loron 13, fulan Marsu, ne’ebé afeta família hamutuk 4681 iha sidade Díli. Sekretáriu Estadu Protesaun Sívil fo ona apoiu alimentar no la’os alimentar sira, inklui material konstrusaun sira ho valor USD 1516.850”, Ministru Prezidensia Konsellu Ministru (MPKM), Fidelis Manuel Leite Magalhães, hafoin reuniaun Komisaun Interministerial iha Palásiu Governu, Segunda (22-06-2020).
Objetivu prinsipal husi enkontru ne’e atu halo debate ba intervensaun governu nian ne’ebé halo ona no kontinua asegura koordenasaun ba medida sira ne’ebé mak sei lao hela hodi halo fo resposta estragu sira ne’ebé provoka husi dezastre naturais no nia impaktu ba populasaun.
“Ministru Obras Públika (MOP), Salvador Pires mos aprezenta dadus sira kona-ba intervensaun sira ne’ebé hala'o ona no sira ne’ebé mak oras ne’e lao hela. No mos prosesu aprovizionamentu sira ne’ebé lao hela ,hodi fo impaktu ba inundasaun ne’ebé mosu iha sidade Díli, iha loron 13, fulan Marsu ne’e. Intervensaun MOP ne’e sei foku ba garante reparasaun ba sistema abastesimentu agua sira ne’ebé hetan estragu, liu-liu halo normalizasaun ba mota sira no konstrusaun ba muru sira. Alénde ne’e Ministru mos aprezenta dadus kona-ba projetu rehabilitasaun estrada no ponte sira ne’ebé hetan impaktu husi bee sa’e iha kosta sul iha fulan Maiu, tinan ne’e”, hateten MPKM ne'e.
Iha enkontru ne’e Xefe Governu mos kongratula Ministériu relevante sira ne’ebé halo servisu maka'as, hodi atende la-lais vitima dezatre natural ne’ebé akontese iha rai laran. Oct
