Governu liu husi Konsellu Ministru (KM), aprova tetu Orsamentu Jeral Estadu, tinan 2020 ho montante biliaun USD1.492.3 no Governu aprova mós kalendariu ne’ebé Governu sei submete ba, Parlamentu Nasionál iha loron (15/09/2020).
“Konsellu Ministru aprova tetu Orsamentál Jeral Estadu (OJE), tinan 2020 ho valór Billiaun USD1,492.3” dehan, Ministru Prezidensia Konsellu Ministru, Fidelis Leite Magalhães, iha Palásiu Governu, Segunda (29/06/2020).
Governante ne’e esplika, prioridade sira ne’ebé defini ona ba OJE 2020 nian hanesan, estabilizasaun ba setór sosiál ho foka ba area saúde, edukasaun, formasaun, bee no setór provadu, kriasaun empregu, ba agrikultura, no ba seguransa alimentarno ba politika makro ekonomiku.
Nia hatutan, tau mós prioridade ba area, reforma administrasaun públika, ekonomia, sistema judisiáriu no jestaun ba finansas públika.
“Bazeia ba prioridade hirak ne’e 33,8% husi valór totál OJE sei aplika ba setór sosiál, 8% ba edukasaun, 15% ba protesaun sosiál, 11% ba saúde, no 48,5% ba dezenvolvimentu ekonomiku no infraestrutura, inklui medida ba estabilizasaun ekonomika iha ambitu Covid-19,” afirma, Fidelis.
Fidelis subliña, Governu mós aprova kalendariu atu prepara OJE 2020 no 2021, projetu husi proposta lei ida ne’e sei aprova iha Konsellu Ministru iha loron 26 fulan Agostu, no sei submete ba Parlamentu Nasionál hahu iha loron 15 fulan setembru tinan 2020.
“Kona-ba kalendariu OJE 2021 nian preve tiha katak, Konsellu Ministru bele apresia proposta lei ne’e iha loron 25 fulan Setembru no sei submete ba Parlamentu Nasional to’o loron 15 fulan Outobru,” Tenik Fidelis. Cin
