Vise Xefe bankada CNRT, Patrocínio Fernandes, hateten, Governu la tau prioridade ba pesoál sira ne’ebé servisu iha liña frente durante Estadu Emerjénsia (EE) hasoru Corona Virus Disease 2019 (COVID-19), tanba to’o ohin loron sira seidauk simu subsídiu ruma ba kontribuisaun ne’ebé durante ne’e sira halo.
“Ha’u husu ita sei iha moral uza liafuan COVID-19 ne’e atu dehan fundu COVID-19, sé ema sira ne’ebé hola risku ba iha asuntu COVID-19 ita la tau atensaun, atu dehan osan ne’e atu halo pagamentu ba ida ne’e, maibé ita halo buat seluk. Ohin ita mai nafatin reforsa fundu COVID-19“,Vise Xefe bankada CNRT ne’e liu husi ninia intervensaun polítika iha Parlamentu Nasionál (PN) Segunda (15-06-2020), durante debate pedidu levantamentu Fundu Petrolíferu (LP) ne’ebé aprezenta husi Governu.
Patrocínio konsidera, ezekuzaun fundu COVID-19 la’ós atu responde ba COVID-19, maibé iha ezekusaun ba pagamentu sira ne’e la tau prioridade, maibé tau iha segunda prioridade.”
Tanba ho esplikasaun Ministru la sadik ita-nia sensibilidade umanu sériu duni moras ida COVID-19 ne’e, tanba ne’e mak ita husu osan ne’e“, tenik Vise Xefe bankada CNRT ne’e.
PN autoriza Governu halo transferénsia FP iha fulan Abril, liu ba ho montante USD tokon 250 husi orsamentu ne’e, USD tokon 100 ba saldu tezoru no tokon USD150 finánsia fundu COVID-19.
Enkuantu iha ezekusaun fundu COVID-19 pesoál liña frente la hetan atensaun husi Governu, tanba realidade to’o ohin loron pesoál sirane’ebé iha liña frente ba kombate COVID-19 seidauk hetan pagamentu. ety
