Xefe bankada CNRT, Duarte Nunes, husu ba Governu atu análiza sistema pagamentu subsídiu USD100 ne’ebé fahe ba kada uma-kain iha Timor-Leste, tanba iha benefisiáriu balun ne’ebé ho salariu USD500 ba leten mós ninia naran submete hotu ba pagamentu, maibé nia parte deklara lakohi simu, nune’e osan ne’e ba fali ne’ebé.
“Iha prosesu pagamentu sei hamosu problema, tanba benefisiáriu ne’ebé fen-laen servisu ho vensimentu USD400 liu Governu halo konta oinsa no nia parte mós foti nu’udár deputadu iha konsiensia la simu subsídiu refere naran sai, maibé oinsa mak bele garante osan sira ne’e fila-fali ba kofre Estadu. Ha’u rona ema barak nia naran iha, maibé nia la simu, nia osan ne’e fila duni ka la’e, ezemplu sira tau tiha Duarte Nunes nia naran iha ne’eba, Duarte la ba, tanba ha’u deputadu, oinsa mak bele garante osan ne’e bele fila, ita sei akompaña haree to’o iha ne’ebé sira-nia kapasidade atu halo buat ne’ebé di’ak tuir iha dekretu hateten ona”, Xefe bankada CNRT ne’e ba jornalista sira iha Parlamentu Nasionál (PN), Sesta (12-06-2020).
Nia akresenta, Governu fó subsídiu ba komunidade hanesan parte ida atu halo rekoperasaun ekonómia, tanba durante Estadu Emerjénsia sira la servisu no laiha osan atu sustenta família.
“Ita akompaña to’ok nia justisa iha ne’ebe PN sei akompaña no fiskaliza, sé bele ita sei buka komisaun inkeritu ida para akompaña, ha’u haree justisa keta laiha karik, maske halo ona identifikasaun dadus, depois mak ita akompaña no investiga, iha posibilidade ita buka komisaun inkeritu ida, ha’u haree justisa laiha karik, hanesan ita iha uma laran nia ema na’in 7 ka 10 nia ba ida ne’e kompara ho ema seluk ne’e oinsa“, hateten Duarte.
Husi sorin seluk, Xefe bankada UDT /FM, Francisco Carlos Xavier, hateten, populasaun durante ne’e laiha tratamentu ho dignu, tanba laiha dintánsia sosiál no prosesu pagamentu tarde, tanba Governu laiha jestaun ne’ebé di’ak ba sistema pagamentu.
Entretantu dau-daun ne’e, Governu kontinua halo pagamentu ba benifisiáriu iha munisípiu 12, la inklui Rejiaun Administrativa Espesial Oe-Cusse Ambeno (RAEOA). ety
