Embaixadór Koreia du Sul iha Timor-Leste, Lee Chin Bum, simu informasaun husi Primeiru-Ministru (PM), Taur Matan Ruak, katak, Governu Timor sei aluga aviaun ida hodi tula fila traballadór Timor-Oan 50 iha Koreia du Sul, tanba kontratu servisu remata ona.
Alénde ne’en aviaun ne’e sei tula mos kandidatu traballadór Timor sira ne’ebé sei ba servisu iha Koreia du Sul, iha tinan ne’e.
Lee Chin Bum, hateten, data fixu atu tula fila trabalhador Timor-Oan sira ne’e Embaixada Koreia sei halo koordenasaun ho Ministériu Negósiu Estranjeiru no Kooperasaun Timor-Leste.
“Asuntu importante ida ne’ebé mak ha’u diskute mak kona-ba traballador sira ne’ebé agora iha Koreia du Sul atu fila la di'ak no sira ne’ebé iha ne’e atu ba servisu la di'ak. Nune’e ohin PM hatete, Governu Timor sei aluga aviaun ida hodi tula fila traballador sira iha Koreia du Sul, nune’e mos ho aviaun ida ne’e sei tula mos kandidatu traballadór sira ne’ebé atu ba servisu iha Koreia du Sul”, Embaixadór Koreia du Sul iha Timor-Leste ne'e iha Palásiu Governu, Segunda (22-06-2020).
Tuir dadus husi Embaixada Koreia du Sul, Timor-Oan ne’ebé dau-daun ne’e kontratu remata ona hamutuk 50 no sira ne’ebé kontratu sei ativu hamutuk rihun rua atus ualu resin.
Entretantu, iha enkontru ne’e PM, informa mos ba Lee Chin Bum kona-ba situasaun polítika atual iha Timor-Leste. Embaixador ne’e hateten, Koreia du Sul disponível atu dezenvolve ekonomia Timor-Leste liu husi fornesimentu liña internet. Oct
