Konsellu Ministru aprova projetu husi proposta lei, hodi halo alterasaun dahuluk ba Lei númeru 11/2017 loron 24 fulan Maiu, kona-ba Lei Migrasaun no Azilu, Dekretu lei ne’e iha kolaborasaun ho Ministériu Interior.
“Lei ne’e atu atribui kompetensia ba Governu atu bele bandu sidadaun estranjeiru sira ne’ebé suspeitu ba COVID-19, no alterasaun ida ne’e atu loke dalan, bainhira iha surtu ruma iha rai laran, ita bele taka fronteira sira”, Ministru Prezidensia Konsellu Ministru, Fidelis Leite Magalhães, iha Palásiu Governu, Kuarta (24/06/2020).
Governante ne’e esplika liu tan, alterasaun ida ne’e ho objetivu autoriza Governu liu husi rezolusaun, fó orden hodi taka temporáriu postu fronteira sira bainhira haree hetan pandemia ida ka emerjénsia saúde iha ámbitu internasionál.
Fidelis hatutan, Konsellu Ministru mós aprova proposta lei, no halo alterasaun dahuluk ba Lei númeru 10/2004, loron 24 fulan novembru, kona-ba lei sistema saúde.
“Ho alterasaun ida ne’e autoridade kompetente sira iha matéria vijilánsia epidemolójiku no sanitáriu, uza mekanismu protesaun ba saúde públiku”, tenik Fidelis.
Governante ne’e haktuir, diploma ne’e atu evita no neutraliza risku atu moras ne’e bele kaer-daet no kona-ba populasaun, entre medida protesaun ba saúde públika ne’ebé inklui iha diploma ida ne’e sei hatama mós posibilidade atu ema sé de’it tenki halo ezame mediku no bainhira deskonfia moras ruma, ne’ebé inklui mós iha lista ne’ebé preve ona.
“Lei ka regulamentu administrativu hodi lori ba internamentu ka tratamentu komplusivu ba izolamentu no kuarentena, iha situasaun ne’ebé at liu ka grave emerjensia ba saúde, bele mós fó orden atu halo konfinamentu obrigatóriu”, afirma, Fidelis.Cin
