Deputada bankada KHUNTO, Olinda Guterres ho deputada bankada CNRT, Maria Fernanda Lay, raut malu iha Parlamentu Nasional, tanba deputada Fernanda Lay la konkorda deputada Olinda hasai deklarasaun rasismu “Xina Pendatang”, nune’e provoka sira halo agresaun fíziku.
Dezentendimentu ne’e mosu bainhira deputada bankada CNRT, Fernanda Lay, halo intervensaun ho lian Portugés iha audiensia públika entre komisaun C ho D ho Ministériu Solidariedade Sosial no Inkluzaun no Komisaun Kosultivu Fundu Petrolíferu kona-ba pedidu levantamentu extraordináriu ne’ebé aprezenta husi Governu.
Hafoin halo intervensaun, deputada bankada KHUNTO, Olinda Guterres, ho lian maka’as hatete atu husu perguntas ka halo intervensaun tenke ho lian Tetuyn nune’e ema hotu bele kompriende.
“Xina Pendatang ne’e. señora ne’e (Fernanda Lay) ba uma ba tradus mak lori mai iha ne’e ita hot-hotu rona, ha’u la eskola. Hatene kataka kolia Portugés ne’e, uluk ne’e halo saida? Ami mate-an didiak mak mai tur iha ne’e. Iha ne’e la koalia Portugés, hakarak koalia Portug’es ba Portugal”,dehan Olinda Guterres ba plenária Kuarta (17/6/2020), iha Parlamentu Nasional.
Hatán ba preokupasaun Olinda Guterres nian, deputada Fernanda Lay, esplika, hanesan reprezentante povu la sala koalia lian Portugés nu’udar lian ofisial ne’ebé hakerek ona iha konstituisaun RDTL nune’e bele sai mos ezemplu ba povu.
“Señora destinta deputada liagua Portugés iha konstituisaun hakerek, se ita bo’ot lakohi Portugés hasai tiha. Uma vez halo pirata uma fukun ida ne’e. hanesan reprezentante povu tenke respeita malu, ha’u la hirus ita diskuti malu é normal entre deputadu sira, mas trata é racismo. iha Amérika agora dadauk iha problema é racismo. Ne’ebé iha artigu 3 konstituisaun RDTL koalia momoos iha neba”,dehan Fernanda Lay.
Vise Prezidente Parlamentu Nasional, Maria Angelina Sarmento, hatete, fukun husi problema ne’e tanba lian pro-kontra koalia lian portug’es.
“Kuandu audiensia ho Vise Ministra MSSI ho Konsellu Konsultivu maka deputada ida halo pergunta ho Portugés ne’ebé deputadu sira la intende”,dehan Maria Angelina Sarmento. Say
