Primeriu Ministru (PM), Taur Matan Ruak, hatete, kona-ba lista kandidadu membru Governu, sira entrega ona ba Gabinete Prezidensia Repúblika hamutuk na’in 19 hodi hein de’it desizaun husi Prezidente Repúblika (PR), Francisco Guterres Lú Olo atu fo pose.
“Lista membru Governu ne’e iha ona Prezidente Repúblika nia gabinete, hein deit marka loron atu toma pose. Dadaun ne’e lista 19 pessoas mak ami hatama”,dehan Xefe Governu Taur ba Jornalista sira, hafoin remata enkontru ho PR Lú Olo, Segunda (15/06/2020), iha Palásiu Prezidensial, Nicolau Lobato, Bairo Píte, Díli.
Antes ne’e, iha loron 29 fulan Maiu, tinan 2020, Prezidente Repúblika Francisco Guterres Lú Olo, fó ona pose ba membru Governu hamutuk nain 8.
Alende ne’e, Taur mos infroma, durante enkontru semanal ho Xefe Estadu, nia parte mos aprezenta situasaun seguransa rai laran, kona-ba Polisia Nasional Timor Leste (PNTL) ne’ebé kaptura RO ilegal ne’ebé tama iha Timor Leste, parte leste Jaco.
“Ne’e enkontru semanal ita bo’ot sira hatene, iha dia 11 ita la iha ne’e loron bo’ot, entaun ohin mak ha’u hasoru sua selensia Prezidente Repúblika, liu liu informa atividade governu nian, ha’u koalia asuntu rua deit, ida mak situasaun jeral seguransa País nian, ha’u informa ba Prezidente ita kaptura Ro ida iha Jaco, sidadaun Indonézia no Vietnam hamutuk sanulu resin mak iha laran, dadaun ne’e foti sira para tau kuarentena, depois halo investigasaun haruka sira fila-fali ba sira nia rain”,tenik Taur. Oly
