Vise Primeira Ministra no Ministra Solidaridade Sosial Inkluzaun, Armanda Berta do Santos hateten, durante ne’e Ministériu Solidaridade Sosial no Inkluzaun (MSSI), simu reklamasaun husi populasaun iha munisípiu 12 hamutuk 10.747.
“Ha’u mai relata aktividade ne’ebé mak durante semana ida ne’e hala’o, ba Xefe Governu, Taur Matan Ruak, ne’ebé foka liu ba progresu pagamentu subsídiu USD 100 agora no mós ba futuru, tanba ita la’o hela ho orsamentu duodesimu”, haktuir, Vise Primeira Ministra no Ministra Solidariedade Sosial Inkluzaun, Armanda Berta dos Santos, iha Palásiu Governu, Tersa (23/06/2020).
Governante ne’e esplika, komunidade iha munisípiu 12, inklui Díli ne’ebé halo reklamasaun ba MSSI to'o horiseik (22/6) hamutuk 10.747, reklamasaun hirak ne’e hahu husi loron (09/06/2020) to’o (23/06/2020) no bazeia ba naran laiha.
Maibé reklamasaun ne’e sei haree fila-fali, tanba balun simu ona osan iha fatin seluk, maibé kontinua ezije atu simu fali ne’e labele, maibé ida ne’ebé mak prense rekezitu MSSI sei halo fali pagamentu.
Ministra ne’e subliña liu tan, pagamentu subsídiu USD 100 ba Rejiaun Administrativu Espesial Oe-Cusse Ambeno, sei iha fulan Jullu nia laran, tanba ekipa taskforce husi MSSI nian sei ba rekolla informasaun no dadus, bainhira loos ona MSSI sei ba halo pagamentu.
“Prosessu pagamentu iha munisípiu 12 kuaze remata ona, maibé hela Díli, tanba iha suku Comoro, Bebonuk no Bairro-Pite, seida’uk hotu, Bebonuk mais ou menus orsida (24/6) hotu, maibé suku rua seluk sei han tempu to’o loron rua foin remata”, tenik Armanda. Cin
