Atu insentiva kresimentu no dezenvolvimentu ekonomia nasionál, Governu delega Ministériu Turismu Komersiu (MTK), atu asina memorandu entendimentu ho Governu Repúblika Indonézia (RI) kona-ba movimentu transfronteira autocarro.
Alende ne’e, fó poder mós ba Ministru Negosiu Estranjeiru no Kooperasaun, Dionísiu Babo, hodi asina akordu ho Repúblika Populár Xina nomos Governu Japão.
Ministru Prezidénsia Konsellu Ministru, Fidelis Leite Magalhães hateten, akordu ida ne’e buka fasilita transporte transfronteira, ba ema no sasan hodi promove, dezenvolvimentu no reforsa komersiu, investimentu, turismu no interkámbiu kultural entra nasaun rua ne’e.
Governante ne’e esplika, akordu ida ne’e buka fasilita transporte transfronteira, ba ema no sasan nomos estabelese sistema transporte ida ne’ebé integradu no efisienti no diak, atu insentiva kresimentu no dezenvolvimentu transporte nasionál.
Haktuir liña ho objektivu ekonómiku ba adezasaun ASEAN no haluan rede transporte terestre no mós servisu seluk, ne’ebé diak hodi estimula sirkulasaun ema no sasan sira entre TL no Indonézia.
Iha opurtunidade ne’e mos, Governu delega mos kompetensia ba MNEK hodi asina akordu ho Repúblika Populár Xina, halo kontrusaun ba Óspitál Amizadee Sinu-Timorense.
“Ministru Negosiu Estranjeiru no Kooperasaun (MNEK), Dionísiu Babo, simu poder, hodi asina akordu ho Repúblika Populár Xina, hodi halo kontrusaun ba Óspitál amizadee sinu-Timorense (Óspitál militar), no eskola Lere Anan Timur,” dehan, Ministru Prezidénsia Konsellu Ministru, Fidelis Leite Magalhães, iha Palásiu Governu, Kuarta (10/06/2020).
Governante ne’e subliña liutan, MNEK mós troka nota entendimentu, ho Governu Japão ba apoiu finanseiru atu sosa, ekipamentu médiku no kapasitasaun instituisionál.Cin
