Ministru Transporte no Telekomunikasaun (MTK), José Agostinho da Silva, hatete Konsellu Ministru (KM) sei análise no diskuti propagasaun COVID-19 iha mundo antes loke fali ligasaun aéreo no nasaun seluk. Entretantu atu atende ba situasaun emerjensia ruma ne'ebe mosu iha rai laran governu estende ona kontrato ho Airnorth.
“Ba konetividade sira seluk hanesan ita iha ligasaun ho Singapura, Indonézia no Malázia governu sei haree ida ne’e, karik reativa fali ita sei tetu didiak no proteze ba desisaun koletiva iha Konsellu Ministro. Maibe tenki haree, mesmo iha Timor-Leste la rejista kasu, maibe realidade iha mundo moras ne’e(Covid-19) existe nafatin. Tamba ne’e maka ita sei tetu iha kontextu ida ne’e hamutuk ho parte saúde nian. Tamba ne’e risku ba saúde públika”, hatete José Agostinho da Silva hafoin retiru VIII governu, Sábadu (27-06).
Tuir Governante ne'e, dadaun ne'e Governu estende ona kontratu ho kompania aéreo australia nian, Airnoth ba fulan ida hodi garante ligasaun aéreo hodi atende nesesidade emerjensia sira.
“Karik iha kontextu balun parte rua Airnorth no Timor-Leste precisa halo komunikasaun no revê atu nune’e parte rua bele konkorda malu. Durante períodu Estadu Emerjensia Airnorth maka asegura ita nia konetividade atu halo atendimentu ba nesesidade emerjensia sira. Agora atu kontinua asegura ita nia konetividade Komisaun Interministerial hatuur ona desizaun atu estende durasaun tempu kontratu ba fulan ida tan”, esplika governante ne'e.
José Agostinho da Silva mos akresenta, kontratu ne’e sei remata bainhira ligasaun aéreo ho nasaun seluk loke ona.
Reuniaun Komisaun Interministerial iha tersa(23-06) deside halakon ezistensia Sentru Integradu Jestaun Krise (SIJK) no deside la estende tan estadu emerjensia, maibe mantein nafatin restrisaun sira iha pontu entrada sira iha fronteira terestre. Oct
