Reprezentante povu iha uma fukun Parlamentu Nasionál (PN), liu-liu bankada CNRT konsidera esplikasaun Ministru Finansas (MF), Fernando Hanjam kona-bá pedidu levantamentu Fundu Petrolíferu (FP) la detallu, hodi hamosu konfuzaun de’it.
“Ita presiza osan husi FP atu reforsa kofre Estadu sim, maibé la’ós ho karakter urjénsia, uza karakter normal ita halo análiza di-di’ak, hodi tau buat sira ne’e iha nia fatin, ezekusaun fundu COVID-19 ita-nia objetivu prinsipál hodi aprova USD 150 milloens ba atu halo prevensaun no kombate COVID-19 a final la tau prioridade, tanba realidade hatudu bainhira asesu iha portal transparénsia atu sosa medikamentu ba ekipamentu no moras COVID-19 no ba iha infraestrutura kuarentena ho sentru izolamentu, maibé ezekusaun orsamentu zero hotu”, deputada bankada CNRT, Carmelita Caetano Moniz liu husi ninia intervensaun iha plenária, wainhira hala’o debate kona-bá proposta Governu ba segundu pedidu levantamentu FP, Segunda (15-06-2020).
Reprezentante povu ne’e informa, to’o fulan Agostu saldo tezoru USD millaun 30 pedidu refere laiha fatin ho karakter urjénsia, tanba PN aprova ona orsamentu USD millaun 150, maibé Governu la tau prioridade ba prevensaun no kombate COVID-19.
Maibé, Vise Xefe bankada FRETILIN, Antoninho Bianco, agradese ba MF ne’ebé fó ona tempu hodi halo esplikasaun polítika ba reprezentante povu iha PN.
“Pedidu sira ne’e bele enviadu dokumentu sira ne’e, ita bele halo leitura alende informasaun ne’ebé mak Ministru ho Vise Ministra hato’o ona, maibé atu justifikasaun, ha’u mós atu RSE tenke liga ho DOT, DOT ne’ebé oras ne’e dau-dauk la’o liga ho RSE 2019. RSE ba tinan 2020 ne’e buat seluk, Governu sei halo halo proposta RSE atu mai iha tinan 2020, tanba tuir konstituisaun no tuir rejimentu tenke mai iha segunda lejislativa, tenke hahu ho loron 15 previsaun”, tenik Vise Xefe bankada FRETILIN ne’e.
Vise MF, Sara Lobo Brites, hateten, maske tuir PN pedidu levantamentu segunda transferénsia extraordinária la urjénsia, maibé Governu presiza atu hetan reforsu iha fulan Agostu, maske seidauk iha Orsamentu Jeral Estadu (OJE), nune’e Governu bele iha kbi’it hodi finansia despeza Estadu.
“Iha situasaun balun PN bele pondera, liu-liu Governu husu ho pedidu urjénsia, tanba haree ba tempu situasaun agora Governu prepara hela OJE 2020. Tuir orientasaun ne’ebé MF simu OJE iha fulan Setembru durante periódu ida agora sei submete OJE iha fulan Setembru, ita seidauk iha orsamentu ruma mak iha entrada em vigor, hodi ezekuta. Maske PN haree la urjénsia, maibé Governu presiza hetan reforsu fulan Agostu em diante, tanba bele asegura bainhira OJE seidauk iha, Governu bele iha kbi’it nafatin atu bele finansia despeza Estadu. Ami mós halo kalkulu sé fulan Setembru submete OJE, PN lori mós tempu debate no aprova ita iha orsamentu nia ezekusaun real, iha fulan tolu hanesan mós iha tinan 2018”, tenik Sara.
Entretantu pedidu levantamentu FP ho montantate USD tokon 286.8 ne’e ne’e atu reforsa saldu tezoru no fundu COVID-19. ety
