Primeiru Ministru (PM), Taur Matan Ruak, deklara, Governu sei tau atensaun másima ba reklamasaun públiku nian kona-ba subsídiu ne’ebé Governu oferese ba populasaun sira perante Estadu Emerjénsia.
“Ha’u hanoin ne’e prosesu ida foin primeira vez mak ita halo, entaun iha problema sira ne’e mas ha’u espera katak, depois de prosesu ne’e hotu ita hadia fila-fali sira ne’ebé iha reklamasaun no sira ne’ebé la los ne’e tenke hadia fila- fali”, subliña Xefe Governu ne’e ba Jornalista sira Kinta (18/06/2020), iha Palásiu Prezidensial Nicolau Lobato, Bairo Píte, Díli.
Nia afirma, pagamentu sira ne’ebé halo dadaun, horiseik (horibainrua) lorokraik entre rihun atus rua sia nulu resin walu, selu ona no rihun atus rua tolu nulu resin ida, iha ne’ebé iha loron hirak mai tan, hanoin ne’e hotu ona.
Entretantu ohin nu’udar loron sanulu ka semana ida resin, Governu halo pagamentu subsídiu dolar atus rua ba kada família iha teritóriu Timor laran.
Nune’e mos, PM Taur, deklara, Timor-Leste oras ne’e nia orgaun soberanu ha’at halo servisu interdependensia ba malu.
“Relasaun orgaun Estadu hotu-hotu ne’e diak, hori uluk kedas, tanba ne’e mak ita-nia nasaun ne’e metin, tanba orgaun Estadu kada ida sira iha funsaun ketak ketak, maibe sira interdependensia ba malu, ne’ebé ha’u hanoin pelo facto de ita nia nasaun hakamatek, atividade la’o diak ne’e signifika katak, ita halo esfrosu para problema sira ne’ebé iha ne’e ultrapasa no konsilida ita-nia konkista sira ne’e”, dehan PM Taur.
Alende ne’e, Taur Matan Ruak mos akresenta, kona-ba lista membru governu dadaun ne’e la iha mudansa ruma, tanba hein deit desizaun data ba pose, enkuantu bainhira iha kestaun ruma kona-ba lista refere, Xefe Estadu sei informa ba governu. Oly
