Primeiru Ministru Taur Matan Ruak hatete, kona-ba esbosu lei kriminaliza defamasaun no injúria, sosiedade presija tempu halo diskusaun uluk molok iha desizaun ruma ba esbosu lei ne’e.
“Ha’u seidauk simu, konselhu ministru seidauk simu, ne’e diskuasaun ida sosiedade sei diskuti, hanoin ita husik para sosiedade diskuti, kestaun rua ne’ebé ita tenki destingue (memebedakan) entre liberdade espresaun, díreitu ema nian atu koalia, no mos tuir ita nian kona-ba insultus buat rua la hanesan, desrespeitu ba ema nia naran, portantu direitu fundamentais ema nian, portantu entre respeitu ho demokrasia buat rua ne’ebé la hanesan, ha’u hakarak sosiedade diskuti lai depois mak ita haree”,dehan Xefe Governu Taur Matan Ruak ba Jornalista sira, Segunda (15/06/2020) iha Palásiu Prezidensial Nicolau Lobato, Bairo Píte, Díli.
Antes ne’e, Ministru Justisa, Manuel Cárceres, hatete, prinsípiu husi esbosu lei atu kriminaliza defamasaun no injúria, la’os atu kastigu ema, maibé atu prevene ema labele uza sala media sosial.
Nune’e mos Sekretáriu Estadu Komunikasaun Sosial, Mericio Juvinal Akara, hatutan, esbosu lei kriminaliza difamasaun no injúria, laiha intensaun atu bandu Liberdade imprensa ka liberdade expresaun.
Maske nune’e Laureadu nobel da paz no sosiedade sivil sira la konkorda atu Timor-Leste aplika lei kriminaliza difamasaun, tanba ne’e sei halakon liberdade espresaun ema ninian, liu-liu Timor-Leste adopta sistema Estadu direitu demokrátiku, la’os Estadu ditadura. Maibe iha individual balu hakarak aplika maibe tenke halo definiasaun klaru.Oly
