Deputadu Parlamentu Nasionál (PN), bankada Fretilin, Dário Madeira, husu Ministeriu Públiku (MP) atu loke investigasaun ba prosesu ezekusaun osan hosi fundu COVID-19 ne’ebé governu aloka tokon USD 150, inklui rekuperasaun ekonomia.
Tanba tuir reprezentante povu ne’e observa katak, mosu injustisa diskriminasaun boot durante halo pagamentu subsídiu ba ekipa front line.
“Sá liña frente mak ita infrenta, ministériu saúde nia koñesimentu ne’e to’o iha ne’ebé, tanba sá mak ajente saúde sira lakomprende buat ida ne’e, tenke halo fali diskriminasaun ba malu. Ezemplu de’it, ekipa liña frente sira nia osan ba fulan rua nian ne’e, parese balun hetan USD 500 no balun USD 600, maibe ajente administrasaun sira, xefe amdinistrasaun sira ne’e hetan fali mil, ne’e injustisa boot. Depois to’o agora funsionáriu saúde sira nia vensimentu to’o agora, sira nia saláriu seidauk tama to’o agora, serake funsionáriu ida hasoru direita ba pasiente, sira atu ba buka fali osan iha ne’ebé mak sustenta nia moris familía nian, dalaruma necessidade familía la to’o, dalaruma fulan klaran de’it deve sa’e tiha ona, satán dada to’o agora,”kestiona reprezentante povu ne’e iha plenária, Segunda (29/06/2020).
Entretantu deputada CNRT, Veneranda Lemos, mos preokupada ho jestaun VIII Governu nian ba prevensaun COVID-19, tanba distansiamentu sosial mos laiha ona, maske moras COVID-19 ne’e iha nasaun viziñu sira sa’e maka’as los.
“Ida ne’e atu hatudu katak depois de Estadu Emerjensia hotu no sala situasaun taka, Governu defaktu ida ne’e laiha duni kapasidade atu fó nafatin informasaun ba povu atu mantein nafatin distansiamentu sosial. Ne’ebé hau preokupa teb-tebes se buat hotu ita halo emerjensia, ita taka emerjensia maibe ita lahatete ba povu saida mak akontese iha ita-nia rai”,dehan Veneranda iha nia intervensaun ba plenária.
Alende ne’e, deputadu CNRT, Patrocino Fernandes, sujere ba deputadu sira komisaun F ne’ebé trata asuntu saúde nian, atu bele buka tuir, kona-bá prosesu hirak ne’ebé mosu diskriminasaun ne’e.
“Problema ida diskriminasaun ne’e, karik falta informasaun ka oinsa ne’e, asuntu ne’e komisaun F mós presiza haree didi’ak to’ok, tanba sa mak bele akontese ida ne’e, ”Sekunda Patrocino iha nia intervensaun.
Antes ne’e, Parlamentu Nasionál autoriza governu hodi halo transferénsia estraordináriu osan hosi Fundu Petrolíferu, ho montante tokon USD 250, ne’ebé aloka tokon USD 150 ba fundu COVID-19, inklui subsídiu uma-kain ho ekipa front line sira durante fulan tolu.
Hafoin ne’e, iha fulan Juñu, VIII Governu mós husu tan autorizasaun tokon USD 286.08, maibe Parlamentu Nasionál aprova de’it pedidu transferénsia estraordináriu ne’e ho montante tokon USD 286.06, tanba USD 500 mil ne’ebé governu aloka hosi fundu COVID-19, Parlamentu Nasionál la konsege ezekuta.Say
