Razaun Parlamentu Nasionál (PN) atu halo eliminasaun ba orsamentu USD rihun 500 husi fundu Corona Virus Disesase 2019 (COVID-19), tanba haree ba situasuan COVID-19 iha Timor-Leste la hanesan ho nasaun sira seluk.
Xefe bankada CNRT, Duarte Nunes, hateten, PN aprova osan ne’e, deputadu sira atu halo akompanamentu ba servisu Governu hodi halo gastu ba fundu refere, maibé haree ba situasaun PN sei halo proposta eliminasaun ba orsamentu PN hodi entrega fali ba Governu.
“Kona-bá orsamentu ne’e, ha’u mós nu’udár proponente ba proposta ida ne’e, tanba iha hanoin haree ba do’ok entaun ita la hatene bainhira mak Covid-19 hotu, iha hanoin tau orsamentu, deputadu sira bele halo akompanamentu ba gastu ne’ebé sira halo durante Covid-19, ami iha bankada konkorda malu atu halo proposta ba elimina husi orsamentu PN entrega fali. Razaun atu elimina tanba COVID-19 la hanesan ho nasaun sira seluk, tanba bele aumenta iha munisípiu 3, ita haree atividade sei la barak, di’ak liu osan ne’e entrega fali ba fundu COVID-19, hodi halo despeza ba buat seluk”, Xefe bankada CNRT ne’e ba jornalista sira iha PN, Tersa (16-06-2020).
Nia akresenta, kona-bá bainhira mak atu halo proposta, ne’e depende ajenda ba plenária, sé bainhira debate ona orsamentu mak bele hato’o ona proposta.
Vise Xefe bankada FRETILIN, Antoninho Bianco, hateten, orsamentu USD rihun 500 ne’e halo proposta hodi fo fali ba Governu, tanba PN iha dotasaun orsamentu temporária atu halo fiskalizasaun.
“Ita hein depois diskusaun lei mak ita haree, tanba ami-nia hanoin balun ami hato’o ona, sé Governu simu, PN halo votasaun bele liu, tanba orsamentu la uza, antes ne’e FRETILIN la apoiu tanba COVID-19 nia osan Governu mak ezekuta foin la-lais iha ambiente la hanesan. Kona-bá atu halo proposta elimina sei iha prosesu diskusaun, maibé PN bele fó hanoin ba Governu no orsamentu ba de’it Governu bele halo servisu oinsa mak bele halo kombate COVID-19”, tenik Vise Xefe bankada FRETILIN ne’e.
Antes ne’e, PN aprova pedidu levantamentu Fundu Petrolíferu (FP) ho montante USD tokon 250, husi númeru ne’e USD tokon 100 ba saldo tezuru no USD tokon 150 ba fundu COVID-19. ety
