Sekretária Estadu Formasaun Profisional Empregu (SEFOPE) haruka ona karta ba Primeiru Ministru (PM), Taur Matan Ruak, hodi hetan aprovasaun atu lori fali traballadora na’in hat (4) ne’ebé gravida iha Austrália.
“Sira na’in 4 ne’ebé gravida? “ami agora prosesa hela, depois haruka ona karta ba PM, para nune’e hetan aprovasaun, tanba problema ne’e sé hanesan bain-bain la presiza, maibé agora COVID-19 ita tenke iha aviaun, boocking antes sira iha Sentru Integradu Jestaun Krize (SIJK) tenke hatene para sira tenke ba kuarentena”, Sekretáriu Estadu Formasaun Profisional Empregu (SEFOPE), Julião da Silva hato’o deklarasaun ne’e hafoin partisipa programa Talkshow iha Sentru Informasaun ba Impaktu COVID-19, Tersa (16-06-2020).
Nia akresenta, traballadora na’in 4 ne’e gravida iha Austrália, tanba wainhira detekta gravida iha Timor-Leste mak Governu sei la autoriza hodi ba servisu.
Iha traballadór na’in 30 resin iha Austrália mak remata ona sira-nia kontratu atu fila mai Timor-Leste, inklui traballadora na’in 4 ne’ebé gravida.
Governu sei ko’alia ho kompañia sira iha Austrália no Korea du Sul hodi estende traballadór sira-nia kontratu, wainhira laiha posibilidade fila mai Timor-leste, tanba ho pandémia COVID-19.
Dau-daun ne’e, traballadór Timor-Oan iha Austrália hamutuk 1000 resin no Korea du Sul 2000 resin.
Entretantu kooperasaun ho governu Japaun hodi haruka traballadór ba nia prosesu sei hein autorizasaun husi governu Japaun no bazeia ba pandémia ne’ebé ataka dau-dauk nasaun hotu iha mundu. ida
