Embaixadór Uniaun Europeia iha Timor-Leste, Andrew Jacobs, hatete, durante enkontru ho Prezidente Repúblika (PR), Francisco Guterres Lú Olo, koalia kona-ba oinsa fortifika kooperasaun bilateral Uniaun Europeia (UE) ho Timor-Leste (TL), liu liu foka ba programa foun ba dezenvolvimentu inkluzivu iha TL.
“Ha’u sente onradu tebes bele hasoru sua selensia Prezidente Repúblika, Francisco Guterres Lú Olo, iha buat barak tebes maka ami diskuti. Ha’u agradese tebes, tanba bele esplika ona mai ha’u kona-ba dezenvolvimentu polítiku rai-laran nian no mos kona-ba mudansa iha Governu no ha’u rasik konkorda katak importante tebes atu mantein parseiru forte entre Uniaun Europeia ho Timor Leste”, dehan Andrew Jacobs ba jornalista sira, Tersa (23/06/2020), iha Palasiu Prezidensial Nicolau Lobato, Bairo Píte, Díli.
Nia hatutan, sira kongratula valor demokrasia, direitu umanu no mos papel lei nian, no nia fiar ba importansia multilateralizmu.
Nia mos kongratula TL ba susesu boot tratamentu COVID-19 ho servisu efetivu Governu ho apoiu PNTL F-FDTL no Organizasaun Mundial Saude, konkorda atu halo nafatin vijilansia, maske agora seidauk iha kazu pozitivu COVID-19 iha TL.
Andrew fundamenta, ekipa Europa agora dau-daun servisu hela iha mundu tomak atu tulun paizes parseiru sira hotu iha luta kontra COVID-19.
“Iha Timor-Leste ami ho kontente disponibiliza USD 3 milloens liu-liu hodi suporta kombate COVID-19. Ami finansia parte husi servisu organizasaun mundial saúde nian, ho Nasoens Unidas ami adapta inisiativa spotligth atu apoia vitima violensia domestika durante pandemia nia laran, ami mos agora dau-daun servisu hamutuk Unicef hodi fornese fatin fase liman nian no sasan ijiene seluk tan, atu nune’e públiku bele hetan mensajen los kona-ba covid-19, ami iha tan orsamentu USD 3 milloens, ne’ebé ami preve hela, inklui apoiu orsamentu diretu ba Governu, liu-liu Uniaun Europeia hakarak apoiu Timor-Leste ba rekoperasaun ekonomiku iha kontekstu Covid-19, importante tebes atu Timor-Leste ho Uniaun Europeia fortifika liu tan sira nia parseria”, subliña diplomta ne’e.
Nia akresenta, koalia ho sua selensia Prezidente kona-ba programa kooperasaun foun entre Uniaun Europeia ho Timor-Leste iha tinan 2021 no programa ne’e sei halao durante tinan 7 nia laran, sira hein katak programa ne’e bele foka liu ba dezenvolvimentu inkluzivu iha kontekstu Asean, sira mos sei kontinua apoiu dezenvolvimentu sustentavel iha komunidade rural, Uniaun Europeia fiar iha potensialidade bo’ot ne’ebé Timor-Leste iha no hanesan amigu ne’ebé besik.
“Ami sei kontinua fortifika ami nia apoiu atu masimiza oportunidade ba Timor-Leste ho ninia povu, maibe parseiru ne’ebé ho Timor-Leste la'os refere de'it ba kooperasaun dezenvolvimentu, iha mundu ne’ebé agora emprevizivel ba bei-beik, importante tebes atu ita hotu bele servisu hamutuk iha Nasoens Unidas no forum seluk, atu kontinua promove ita nia valores ba demokrasia no direitu humanu no mos defende orden internasional bazeia ba regra”, tenik Andrew. Oly
