Parlamentu Nasionál (PN), preokupa ho destinu profesór kontratadu sira ne’ebé to’o agora Ministériu Edukasaun Juventude no Desportu (MEJD), seidauk rezolve sira-nia estatutu, maibé MEJD hakarak halo tan rekrutamentu ba profesór voluntáriu 444.
“Iha orsamentu tinan fiskál 2021 PN aprova ona vaga ba profesores 900 resin, maibé tuir informasaun ne’ebé iha, MEJD sei rekruta tan profesores voluntarius 444, ha’u-nia preokupasaun oinsá destinu profesores kontratadus 5000 resin,” dehan Deputadu Bankada CNRT, Gabriel Soares, durante intervensaun iha Plenária, Segunda (22/6/2022).
Deputadu CNRT ne’e husu MEJD atu halo justifikasaun kona-ba rekrutamentu foun ba profesór voluntáriu ne’ebé Ministériu planeia atu rekruta tan.
Nune’e mós, Prezidente Komisaun G trata asuntu Edukasaun Juventude no Desportu, Deputadu António Verdial, kestiona, durante tinan hira ba kotuk, MEJD rejista ona profesór espesial hira? Oinsá ho dezenvolvimentu ba rekrutamentu profesór sira?
“Ministériu Edukasaun identifika ona profesores hira mak laiha vokasaun no profesores hira mak buka deit osan, tanba bazeia ba deklarasaun Ministru Edukasaun nian hatete katak, profesór barak mak laiha vokasaun maibé buka deit osan”.dehan.
Nune’e mos Deputada Bankada CNRT, Maria Fernanda Lay, husu MEJD atu sensível kona-ba problema profesór kontratadu sira ne’ebé seidauk rezolve, maibé hakarak kontratu tan profesór voluntáriu, no oinsá atu selu.
“Husu mos ba Komisaun C trata Asuntu Finansa Públika, atu tau atensaun ba ezekusaun orsamentu retifikativu, ne’ebé Parlamentu Nasionál aprova”.tenik
Hatán ba kestaun ne’e, Ministru Asuntu Parlamentár no Komunikasaun Sosiál (MAPKOMS), Francisco Jeronímo, hatete, asuntu hotu ne’ebé ligadu ho problema edukasaun, rejista hela no sei informa ba Ministériu relevante, nune’e bele marka tempu ba iha loron 4, fulan Jullu atu Ministru Edukasaun mai esplika direta ba deputadu sira iha Parlamentu Nasionál. Fel
