Parlamentu Nasionál (PN) husu Sekretaria Estadu Formasaun Profísional no Empregu (SEFOPE) atu hadi’ak sistema atendimentu ba Timor-oan sira, ne’ebé atu tuir teste lian Koreia no mos ba Austrália.
“Ha’u lamenta no kondena ho situasaun ne’ebé akontese iha loron lima liu ba, joven lobuk ida tenke hadau malu, balun sa’e moru to’o hetan kanek, tanba deit atu tuir teste lian Koreia, no ha’u nia lamentasaun ne’e tanba SEFOPE la halo mekanizmu ida di’ak ho efisiénsia no efikas iha prosesu rekrutamentu ka teste ba joven sira atu ba Koreia,” dehan Deputada bankada PD, Elvina Sousa, durante intervensaun iha plenária, Segunda (13/06/2022).
Deputada ne’e afirma, situasaun ida ne’e triste tebes bainhira haree joven sira dudu malu no sena malu to’o kanek, no hanesan reprezentante povu lamenta tebes no husu esplikasaun no klarifikasaun hosi SEFOPE, tanba saida akontese situasaun ne’e. SEFOPE iha obrigasaun atu asegura rekrutamentu saida deit no tenke halo di’ak hodi prezerva dignidade joven sira ne’ebé tuir formasaun lian Koreia no ba tuir teste ba Austrália.
“SEFOPE tenke hadi’ak mekanizmu atendimentu atu nune’e ba oin labele akontese tan, tanba ida akontese loron hira liu ba ne’e hatudu tratamentu ida la dignu ba joven sira no hatudu inkapasidade hosi lideransa ne’ebé tutela ba,”dehan.
Nune’e mós deputadu Antónino Bianco, haktuir presiza hadi’ak sasán balun tanba kondisaun fatin ba formasaun joven sira iha área lian Koreia no Austrália la merese, nune’e PN buka tok atu aprova osan hodi hadi’ak kondisaun fatin ba formasaun lian Koreia no Austrália.
“SEFOPE halo servisu maibé presiza hadi’ak kestaun balun. Komisaun enkontru ona katak, tenke halo estensaun kursu lian Koreia bele to’o Munisípiu, maibé tenke instala mós fatin, nune’e joven sira iha munisípiu bele partisipa mós kursu lian Koreia hodi labele mai hadau malu hanesan akontese dau-daun”,haktuir.
Deputada bankada Frente Mudansa, Isabel Ximenes, salienta atendimentu SEFOPE ne’e lamentável tebes tanba joven lubun ida tenke fó sira nia an iha risku, tanba deit hodi hetan atendimentu nune’e bele tuir teste lian Koreia.
Alende ne’e, husu mós ba Sekretaria Estadu Formasaun Profísional no Empregu (SEFOPE) atu haree prosesu sira ne’ebé pendente hela ba joven sira, ne’ebé liu ona teste no hetan ona aseitasaun hosi kompañia sira hosi Austrália, tanba ne’e husu atu SEFOPE rezolve kestaun sira hanesan ne’e.Fel
