Deputadu bankada Partido Democrático (PD), Adriano do Nascimento, deklara, atu solusiona polémika kazu kareta prado ne’ebé eis deputadu balun seidauk entrega, ne’e iha lideransa meja Parlamentu Nasional (PN) nia liman, tanba kareta hirak ne’e ninia estatutu privadu tiha ona, nune’e presiza prosesu legal ida hodi dada fali husi eis deputadu sira.
”Kona-bá asuntu kareta prado ne’e depende ba lideransa meja Prezidente PN ninian, tanba uluk desizaun prezidensia meja PN, liu husi enkontru lider bankada ninian hola desizaun katak deputadu sira bele halo aliñamentu no kareta hotu-hotu troka ona xapa mean no STNK sai privadu, maibé tanba presaun públika Prezidente PN hasa’i fali desizaun administrativa ida, maibé legal ne’e laiha tanba STNK sei privadu hela, nune’e tribunal labele hateten STNK ne’e la vale, ne’ebé ne’e prosesu legal,” deputadu PD, Adriano do Nascimento ba jornalista sira foin la-lais ne’e iha resintu PN, Díli.
Nia akresenta, agora hein de’it desizaun husi meja Prezidensial PN, sera que atu fó kontinuasaun ne’e halo nusa no loloos ne’e PN hanesan lejislador tenki rezolve prosesu administrativa no prosesu legal la’o dala ida de’it, maibé foin maka rezolve prosesu administrativa.
“Kestaun ida ne’e agora dau-dauk iha nivel lideransa ninian atu follow up, tanba osan fó fila hotu ona, xapa matrikula halo tiha ona, agora sé maka hateten plat metan ne’e la vale, tanba plat metan ne’e Governu maka hamosu, ne’ebé meja prezidensial PN tenki hakotu no prosesu ona kestaun legal no administrativa ne’e,” relata Adriano do Nascimento.
Deputadu husi bankada PD ne’e hatutan, isu kareta prado ne’e sai fali polémika, preokupasaun públiku no demonstrasaun, entaun derepenti dehan la jadi, entaun PN fó fila ona osan lelaun ba deputadu sira. Nia parte, inklui eis deputadu PD balun entrega hikas ona kareta prado ba Sekretariadu PN no eis deputadu balun seidauk entrega, tanba prosesu legal seidauk la’o.
“Ha’u espera katak PN V lejislatura ho ninia lideransa no partidu boot Aliansa Mudansa ba Progresu (AMP) bele rezolve ona kestaun ida ne’e,” hateten lider PD ne’e.
Tuir deputadu bankada partidu FRETILIN, Francisco Miranda Branco hateten, atu solusiona kazu kareta prado ne’e, kabe ba kompeténsia prezidenti meja PN.
“Husi ami nian balun seidauk entrega, maibé ida ne’e la’os relasaun ho ami, ne’e kompetensia PN ninian no tuir informasaun ne’ebé média fó sai katak Prezidente PN seidauk hanoin atu sosa kareta prado ba deputadu foun sira,” relata deputadu bankada FRETILIN ne’e.
Antes ne’e mós movimentu estudante Timor-Leste, sosiedade sivíl sira ejiji ba PN atu labele sosa tan kareta ba deputadu foun sira iha V lejislatura, tanba kareta prado tuan sira ne’ebé maka eis deputadu sira uza kondisaun sei di’ak hela. Ves
