Ministru Negosius Estranjeiru no Kooperasaun (MNEK), Dionísio Babo, sai enviadu extra-ordenária ne’ebé reprezenta Prezidente Repúblika, Francisco Guterres ‘Lú Olo’ iha simeira Comunidade dos Paies de Lingua Portuguêsa (CPLP) ne’ebé hala’o iha Caboverde.
Ministru Dionísio Babo informa, PR Lú Olo hasai dekretu Prezidensial ida hodi indika nia atu Estadu Timor-Leste bele partisipa iha simeira CPLP iha Caboverde.
“Prezidenti Repúblika halo ona dekretu Prezidensial ida, ne’ebé indika Ministru Negosiu Estranjeiru atu sai emviadu extra-ordináriu atu ba reprezenta ita-nia nasaun iha simeira CPLP iha Caboverde,” informa Dionísio Babo, ba jornalista sira iha Palasiu Governu, Kuarta (11/07).
Nia haktuir, simeira CPLP ba enkontru Xefi Estadu CPLP sei hala’o iha loron 17 to’o 18 fulan ida ne’e. Alende enkontru Xefi Estadu CPLP, sei iha mós enkontru Ministru Negosiu Estranjeiru CPLP nian.
“Tanba ne’e, ajenda okupadu oituan, maibé Prezidenti Repúblika fó ona dekretu Prezidensial ne’e, tanba ne’e mak ha’u sei ba reprezenta,” katak Dionísio.
Nia hatutan, ajenda sira ne’ebé mak prepara tiha ona husi Caboverde, Dionísio sei hola fatin hanesan kargu Xefi CPLP, no Ministru Negosiu Estranjeiru.
“Sira iha ajenda lobuk ida, iha relasaun ho lingua, kultura, no iha mós kestoens sira ne’ebé iha relasaun ho elevasaun kualidade traballu ba CPLP ne’e rasik, liu-liu iha tinan lima mai,” relata Dionísio Babo.
Antes ne’e, Parlamentu Nasional kansela vizita Prezidenti Repúblika, Francisco Guterres Lú Olo nian ba Portugal ho votus kontra 35, a favor 29 no abstensaun 0, tanba konsidera Prezidenti Repúblika Lú Olo labele husik hela impase polítika iha rai laran.cos
