Deputada bankada Fretilin, Maria Angelica Rangel, liu hosi sesaun plenaria diskusaun programa ba faze daruak, Kinta (26/07/2018), ezije bankada Governu atu bele diskute programa VIII Governu ho kualidade no konstrutivu ba interese povu no nasaun.
“Ami hakarak debate ne’e ho kualidade, ba interese povu nian, la’os ami atu halo esklaresimentu ita bo’ot sira lori ita bo’ot sira-nia otorita ne’e atu hapara fali ami, ne’e la’os debate, ita hakarak debate atu halo loos ba povu ne’e liu hosi programa ne’e, se imi (AMP) lakohi debate entaun vota de’it ona, tanba imi maioria,”hateten deputada Maria Rangel.
Hatan ba kestaun ne’e, deputadu bankada PLP, Fancisco Vasconçelhos, hateten, lapresiza lakon tempu atu diskute tan programa ne’ebé mak iha hela kualidade, tanba FRETILIN rejeita uluk tiha ona ho mosaun sensura hodi kontra Programa ne’e antes halo diskusaun.
Tanba ne’e, nia parte prefere halo eleisaun de’it ona ba programa, atu nune’e labele lakon tempu tan hodi debate, tanba FRETILIN kontra ona.
“Ha’u konkorda ho deputadu sira, di’ak liu ita ba vota, duke ita diskute tan, tanba estraga tempu de’it,”dehan deputadu bankada apoia Governu ne’e.
Tuir deputadu PLP ne’e, bankada FRETILIN kontra ona programa ne’ebé VIII Governu aprezenta, antes halo diskute klean, tanba ne’e diskute oinsa mós sei la hetan apoiu husi parte bankada opozisaun nian.
“Foin mak debate sira hatama tiha ona mosaun rejeisaun, ne’e hatudu katak sira bele diskute to’o iha ne’ebé mós sira pensamentu ne’e rejeita tiha ona, sira kontra tiha ona programa governu ne’e, sira hatama tiha mosaun rejeisaun ne’e, implika ba sira nia pensamentu, tanba sira hakarak debate ne’e ho kualidade, atu nune’e programa ne’e lori benefisiu ba povu, maibe iha sira-nia pensamentu seluk ne’e sira rejeita no lakonkorda ho Governu nia programa, ne’e kontrariu ho sira nia hakarak,”katak Vasconçelhos.
Enkuantu, bankada FRETILIN aprezenta mosaun sensura hodi kontra programa Governu iha loron dahuluk diskusaun programa VIII Governu nian, ho razaun programa VIII Governu nian ladun refelete nesesidade atual.
Mosaun rejeisaun ne’e rasik, sei halo leitura, antes halo eleisaun ba programa, iha diskusaun ba loron ikus nian.Say
