GMN TV Politika FUNSIONA MAKINA ESTADU, GOVERNU HALO ALTERASAUN BA REJIME DUODÉSIMU

FUNSIONA MAKINA ESTADU, GOVERNU HALO ALTERASAUN BA REJIME DUODÉSIMU

0 views

Governu da-ualu (VIII) ne’ebé xefia husi Primeiru Ministru (PM), Taur Matan Ruak, halo ona alterasaun ba dekretu Governu númeru 1/2018, kona-ba orsamentu rejime duodésimu.

Alterasaun ne’e, realiza liu husi Konsellu Ministru extra-ordinária ne’ebé hala’o iha loron Sesta (13/07), iha Palasiu Governu.

Portavoz Konsellu Ministru, Fidelis Magalhães, hatete, alterasaun ba rejime duodesimal ne’e atu loke dalan hodi finansia ka halo pagamentu ba ferik katuas sira, bolsa da mãe no seluk tan.

“Reuniaun extra-ordináriu Konsellu Ministru, ami rona aprezentasaun kona-ba plafon Orsamentu Estadu ba 2018, no ami mós aprova proposta segunda alterasaun ba dekretu Governu númeru 1/2018, kona-ba diskusaun orsamental rejime duodesimal,”relata Portavoz Konsellu Ministru, Fidelis Magalhães.

Nia esplika, alterasaun ba rejime duodesimal ne’e, atu fasilita ezekusaun osan liu husi rejime duodesimal ne’e, presiza lei ida.

“Lei ne’e mak ita dehan, atu regula osan duodesimal ne’e, no alterasaun ne’e atu dehan katak, duodesimal ida agora ne’e, atu halo kobertura ba funsionamentu mákina VIII Governu ne’e, no atu premite hodi halo pagamentu ba pensoens sira hanesan idozus,  invalides sira no bolsa da men,” relata Fidelis.

Nia haktuir, proposta ba aumenta orsamentu duodesimal ne’e, Governu haruka on aba Parlamentu Nasional iha loron Kinta (12/07).

 “Ho razaun ida ne’e mak Governu halo pedidu ba atu halo proposta lei ida, ne’ebé autoriza transferensia osan husi fundu petroliferu mai ho montante US$ 140 milloens, aumenta tan ho US$ 20 milloens ne’ebé mak iha hela kofre Estadu ne’e,” tenik Fidelis.

Karik osan duodesimal US$ 140 ne’e mai, Governu sei uza US$ 88 milloens ba fulan ida ne’e, atu atua pagamentu sira ne’e hotu.

Maibé ba tinan tomak ne’e, ami se haree haree hela opsaun rua ka tolu, atu hatene katak, husi fulan agora ba to’o Desembru ne’e, presiza osan hira. Maibé Fidelis dehan, ida ne’e nia seidauk bele ko’alia sai ba públiku, tanba se iha hela diskusaun nia laran.

Nia esplika, orsamentu duodesimal US$ 140 milloens ne’e, ninia estimativa conservative ne’e, ba de’it fulan rua (Jullu ho Agustu).

“Ita halo kalkula hanesan ne’e, osan duodesimal ne’e US$ 140, aumenta ho osan US$ 20 milloens ne’ebé sei iha, no aumenta tan ho osan reseitas doméstika ne’ebé previzaun ba fulan ida ne’e US$ 15 milloens,”katak Fidelis.

Governu sei aprezenta programa antes loron 22 Jullu

Nune’e mos, Portavoz Konsellu Ministru, atual Ministru Reforma Lejizlativa no Asuntu Parlamentar, Fidelis Magalhães, informa, data fiksu ba Governu atu halo aprezentasaun programa iha Parlamentu Nasional ne’e, sei hala’o antes loron 22 Jullu.

Tuir Fidelis, programa ne’e rasik sei aprezenta direta husi Primeiru Ministru, Taur Matan Ruak.

 “Ita hein husi agora to’o loron 22 Jullu, tanba programa Governu nian ne’e, tenki tama antes loron 30 hanesan buat ne’ebé mak temi tiha ona iha konstituisaun,” katak Fidelis ba jornalista sira iha Palasiu Governu, Sesta (13/07).

Nia hatutan, kuandu estrutura Governu seidauk kompletu hanesan agora ne’e mós, Governu sei kontinua aprezenta program aba Parlamentu Nasional.

“Maibé iha efeitu, tanba ne’e ladiak ba Governu ida atu halo lalais ninia servisu para responde ba povu nia preokupasaun, no atu iha duni estrutura kompletu atu ministru ida-ida bele servisu ona ho rigor, esforsu no enerjia tomak ba nia servisu, entaun impaktu psikolojiku ne’e ladiak no difikulta. Entaun ami dezeja para bele iha solusaun lalais, para Governu ne’e bele hahú la’o,” relata Fidelis.

Maibé Fidelis esklarese, impaktu legal ka konstitusional nian, laiha tanba Governu hamrik ona, no halo ona servisu balun.

Nia afirma, estrutura Govermu la kompletu ne’e, hatodan de’it servisu Ministru sira nian, tanba Ministériu balun tenki tutela fali ba Ministru ida, tanba Ministru seidauk iha.cos


Banner

Foto

Notisia Ikus

PR Ramos Horta sei halakon LPV iha tinan 2023

June 24, 2022
Prezidente Repúblika (PR), José Ramos Horta, h...

To’o agora deputadu barak la hatene ko’alia Portugés

June 23, 2022
Maske Timor-Leste ukun-an tinan 20 ona, maibé p...

Australia sei fasilita bolsa estudu ba Veteranu no Martires nia oan

June 21, 2022
Embaixadór Australia iha Timor-Leste (TL), Bill...

PR Horta: TL mos hetan impaktu husi krize geopolítika mundiál

June 21, 2022
Prezidente Repúblika nu’udar mos premiadu nob...
1 2 3 739

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker