Ministru Estadu no Prezidénsia Konsellu Ministru, Agio Perreira, informa, VIII Governu iha tempu badak sei lori akordu negosiasaun Fronteira Marítima (FM) entre Timor-Leste ho Australia, ba Parlamentu Nasional (PN) atu ratifika.
Maibé Agio hateten, dadaun ne’e Governu mos fo prioridade ba lei orgánika VIII Governu, tanba Orsamentu Jeral Estadu 2018 depende ba orgániku Governu.
“Konsellu Ministru sei hatun mai Parlamentu Nasional, maibé agora ne’e tanba Governu sei haree hela Orsamentu Jeral Estadu 2018 ne’ebé urjenti tebes, no Governu tenki submete lei orgánika VIII Governu ba Prezidenti Repúblika atu ratifika,” tenik Agio Perreira.
Agio dehan, kona ba negosiasaun mina matan Greater Sunrise ne’e, ema hotu hatene katak, lidera husi Kay Rala Xanana Gusmão, no hetan apoiu husi Maritime Boundry Office (MBO).
“Maun bo’ot sei determina bainhira mak hahú, no sei iha kalendáriu negosiasaun ne’e, hodi to’o akordu atu implementa TLNG,” informa Agio Perreira.
Alende ne’e, Agio Perreira esplika, Ministériu Konsellu Ministru ne’e nia servisu lahanesan ho ministériu sira seluk. Konsellu Ministru ne’e hanesan orgaun polítiku ida, ne’ebé nia kompetensia hotu hakerek ona iha lei orgániku Governu nian.
“Prezidensia Konsellu Ministru atu tau matan ba Konsellu Minisru, sai portavoz ba Governu tomak, nomós tau matan ba kazu legais ne’ebé mak Estadu tenki hasoru, ida ne’e mak knaar prinsipal Prezidensia Konsellu Ministru nian,”dehan Agio Perreira.
Nia esplika, kna’ar polítika Prezidensia Konsellu Ministru nian mak fó apoiu total ba Primeiru Ministru, hodi bele garante funsionamentu normal Governu tomak nian, tuir nesesidade,”relata Agio Perreira.
Entretantu, Timor Leste ho Australia konkorda ona asina tratadu fronteira marítima iha loron 7, fulan Marsu, tinan ne’e, ne’ebé ofisialmente asina iha Nova Iorque Estadus Unidus.cos
