Lideransa Koligasaun Aliansa Mudansa ba Progresu (AMP), halo kompromisu ba públiku iha kampaña eleitorál katak, bainhira AMP manan hodi lidera rai ida ne’e, sei hasai Prezidenti Rejiaun Administrativa Espesial Oe-cusse Ambeno (RAEOA) Marí Alkatiri husi Oecussi. Maibe to’o agora seidauk iha realizasaun.
Desizaun atu hasai Marí Alkatiri husi Oecussi ne’e, AMP sira promete sei foti iha primeiru reuniaun Konsellu Ministru VIII Governu nian. Maibe realidade reuniaun Konsellu Ministru VIII Governu ba dala rua ona, maibé kompromisu AMP nian, atu hasai Marí Alkatiri husi Oecussi seidauk realiza.
Portavoz Konsellu Ministru, Fidelis Magalhães, promete tan dala ida, AMP sei kumpri nia kompromisu eleitorál ne’ebé halo ona ba povu.
“Ohin ne’e ita ko’alia no preokupa kona-ba kofre Estadu, polítika ne’e preokupasaun ida, ida ne’e kompromisu eleitoral ne’ebé Primeiru Ministru halo, maibé situasaun agora ne’e, buat ne’ebé mak presiza ita hotu nia atensaun mak, Governu tenki iha osan, atu bele asegura bens estar ita-nia povu no ita-nia nasaun,” dehan Fidelis Magalhães, ba jornalista sira iha Palasiu Governu, Kuarta (11/07), hafoin enkontru Konsellu Ministru.
Iha enkontru Konsellu Ministru ne’e mós, aprova ona rezolusaun ida kona ba donativu ba reprezentasaun permanente, Repúblika Arabia Serawi Demokráta, tanba Repúblika Arabia ne’e iha Sahara Osidental.
“Ami halo rezolusaun Governu ida atu haree, tanba durante ne’e ita Timor Leste mak apoiu sira ba sira-nia embaixada, no apoiu sira-nia amizade iha rejiaun,” informa Fidelis.
Nia dehan, rezolusaun Governu ne’e, atu espresa de’it Governu Timor Leste nia preokupasaun kona ba Governu nia kompromisu atu kontinua apoiu povu Sahara. Maibé Fidelis esplika, nia efeitu ne’e, bainhira Governu iha ona orsamentu mak Governu Timor Leste bele haree situasaun ne’e.cos
