Eis Prezidenti Repúblika (PR), José Ramos Horta, husu ba Estadu liu husi PR Francisco Guterres ‘Lú Olo’ no Governu, atu hametin diak liu tan relasaun ho Korea do Sul, nune’e bele tau atensaun ba traballador Timor oan sira iha Korea do Sul, tamba oras ne’e dadaun traballador Timor oan ne’ebé servisu iha rai ne’eba ilegal hamutuk 400 resin.
“Ha’u hatete ba Prezidenti Republika hamutuk ho Governu atu tau matan ba ita- nia situasaun traballador sira iha Korea do Sul, tamba ita iha relasaun ho Korea do Sul importante tebes, ha’u-nia hanoin Timor tenki buka aumenta relasaun diak ho Korea do Sul, tamba rai sira iha Asia ne’e, liu-liu Korea simpatia ho Timor klean tebes,”dehan eis PR Horta ba Jornalista sira segunda (2/06/2018) iha Palasiu Prezidensial Bairo Pite Dili, hafoin relata nia servisu ne’ebé hala’o iha estranjeiru liu liu koalia konaba partisipasaun Timor Leste iha Organizasaun Nasoens Unidas iha Nova Iorque.
Horta Subliña liu tan, to’o agora Timor Leste seidauk aproveita didiak haklean relasaun ho Korea do Sul, tamba Korea do Sul prontu nafatin atu hasoru traballador Timor oan barak liu tan ne’e nu’udar desizaun politika ne’ebé halo tiha ona, maibe preparasaun ba traballador Timor oan sira atu ba Korea mak seidauk diak.
Nia akresenta tan, Timor Leste bele hetan Timor-oan atus ba atus no rihun ba rihun ba Korea do Sul, maibe preparasaun lingua Korea no kultura Korea nian iha Timor tenki diak.Oly
