Movimentu Universitariu Timor Leste (MUTL), ezije ba deputadu V lejislatura iha Parlamentu Nasional (PN), atu esplika klaru lalaok lei Pensaun Vitalisia (PV) ba públiku hodi bele hatene.
Membru MUTL, Luis Garcia, hateten, tuir nia hatene, lei pensaun vitalisia ne’e mak muda, maibé osan pensaun vitalisia ne’e, eziste nafatin.
“Ha’u hanoin kestaun ba lei pensaun vitalisia ne’e, ezijensia husi estudante sira universitáriu ne’e lao, maibé akontese tiha ona tinan kotuk hanesan ita hatene, agora kestaun ida lei pensaun vitalisia ne’e, atu muda ka lamuda ne’e, depende ba vontade husi membru deputadu sira agora, liu- liu sira ne’ebé mak foin eleitu husi povu tomak, fó konfiansa ba sira tu’ur iha Parlamentu Nasional,” hateten Luis Garcia iha Kampus Colmera Dili, Kuarta (4/7).
Nia hatutan, polítika nain sira iha tempu kampaña, sira hatete katak, pensaun vitalisia ne’e sira muda ba seguransa sosial, maibé mekanismu ba seguransa sosial ne’e oinsa, tenki esplika kalru, ho nune’e públiku bele hatene.
Antes ne’e mós MUTL no sosiedade sivil halo ona protesta maibé seidauk iha resposta husi membru Parlamentu Nasional. aba
