Primeiru Ministru (PM), Taur Matan Ruak, hatete, lista ba kandidatu membru VIII Governu balun ne’ebé Prezidente Repúblika (PR) seidauk fo pose, tamba sei hala’o hela diálogu ho PR atu hetan solusaun ne’ebé definitivu.
“Ohin (horseik-red) ha’u enkontru ho Prezidente Repúblika (PR), Francisco Guterres ‘Lú Olo’ tamba hetan konvite husi PR, kontinua koalia kona-ba lista, ami seidauk iha solusaun konaba lista ne’e. Tamba ne’e ami sei nafatin hala’o diálogu ho Prezidente hodi bele hetan solusaun definitivu ba lista ne’ebé ami aprezenta,”dehan PM Taur ba Jornalista sira hafoin remata enkontru ho PR Lú Olo iha Palasiu Prezidensial Bairu Pite Dili, Tersa (3/07/2018).
PM Taur afirma, sira sei hetan solusaun hamutuk ba lista ne’e, hafoin kandidatu membru GOvernu sir abele simu pose, tamba hanesan PM hakarak iha solusaun sedu ba kestaun ne’e.
“Tamba ita-nia Estadu ne’e, funsiona ho orasamentu duodésimu, ita agora ne’e osan la iha, tamba ne’e Governu tenki haree programa no orsamentu ba tinan 2018 no tinan 2019 nian, orgániku Governu nian rasik ne’e nu’udar servisu Governu nian ne’ebé barak los,”hatutan Xefi Governu ne’e.
Entretantu Prezidente Repúblika Fransisco Guterrse ‘Lu-Olo’ fo ona pose dahuluk ba membru Governu hamutuk 28 iha loron 22 fulan Juñu, tinan ida ne’e, no membru Governu balun hamutuk 13 mak seidauk simu pose, tamba kandidatu membru Governu balun kona hela kazu iha Tribunal.Oly
