Parlamentu Nasionál (PN) liu hosi plánaria Tersa (03/07/2018), deside ona membru nain 3 nu’udar reprezentante ba Konsellu Superior Defeza no Seguransa (KSDS) nian.
Reprezentante deputadu membru Parlamentu Nasionál ne’e, mai husi bankada FRETILIN, David Diaz Ximenes Mandati, bankada CNRT, Adérito Hugo no bankada PLP mak Abel Pires.
Desizaun ba hili kandidatu hirak ne’e, bazeia ba proporsionalidade kadeira kada bankada ne’ebé barak liu iha Parlamentu Nasionál ba V lejislatura nian, liu hosi votasaun sekretu ho rezultadu votasaun, passa ho votus a favor 57, kontra 0, abstensaun 3 no votus nulu hamutuk 2 no tatal buletin votus 62, no deputadu auzente 3.
Hafoin deputadu sira remata eleisaun, Prezidente Parlamentu Nasionál, Arão Noe de Jesus Amaral, anunsia, membru hirak ne’e mak sei reprezenta Parlamentu Nasional iha Konsellu Superior Defeza no Seguransa.
“Ho rezultadu votasaun ne’e, ami deklara Konsellu Superior Defeza e Seguransa eleitu ho kompozisaun sira mak hanesan tuir mai ne’e, númeru 1 deputadu Adérito Hugo da Costa, 2 deputadu Abel Pirez da Silva no númeru 3 deputadu David Diaz Ximenes Mandati, ida ne’e mak deputadu sira ne’ebé eleitu atu reprezenta Parlamentu Nasionál iha Konsellu Superior Defeza no Seguransa,”relata Prezidente PN, Arão Noe Amaral iha plenária.
Alende ne’e, líder máximu orgaun lejislador ne’e deklara, suspende ajenda eleisaun ba membru Konsellu Estadu no reprezetnate Parlamentu Nasionál ba Uniaun Inter-Parlamentar (UIP) iha entre nasaun sira CPLP nian ba tinan 2018, tanba submisaun ba lista kandidatura seidauk kompletu, tanba ne’e nia parte deside ajenda refere adia ba plenária semana oin.
“Ita suspende tan ba semana oin, hein katak semana ida ne’e, bele kompleta tiha kandidatu ba membru Konsellu de Estadu, no mós eleisaun ba grupu nasionál Parlamentar CPLP no mós delegasaun Parlamentar ba UIP nian, hein katak bele kompleta tiha, atu nune’e plenária tuir mai ita ba halo eleisaun kedas,”Deklara Arão Noe de Jesus Amaral.
Enkuantu iha plenária Tersa horseik ne’e mós, deputadu V lejislatura diskute kona-ba deliberasaun nú 5/V/1ª kriasaun grupu Parlamentares amizade ba V lejislatura nian.Say
