GMN TV Politika PROPOSTA FOTI FP KATEGORIA URJENSIA APROVADU ■FRETILIN-PD KONTRA

PROPOSTA FOTI FP KATEGORIA URJENSIA APROVADU ■FRETILIN-PD KONTRA

Parlamentu Nasionál (PN) liu hosi plenária extraordinária Sesta (20/07/2018), deside ona karakter proposta autorizasaun foti osan Fundu Petrolíferu (FP) US$ 140 milloens ne’ebé rekomenda husi VIII Governu konstitusional, ba kategoria urjensia liu hosi votus a favor 36, kontra 27 no abstensaun 1.

Iha votasaun kontra ne’e maioria husi deputadu bankada FRETILIN no Partidu Demokrátiku (PD).

Deputadu husi bankada opozisaun FRETILIN, Antonino Bianco, konsidera pedidu Governu ne’e la nessesariu, tanba lei jestaun rejime duodésimu fó dalan ba kualker Governasaun atu foti osan, hodi sustenta mákina Estadu.

“FRETILIN tau kedas lei ona, lei orsamentu jestaun finanseira, no kria mós fundu mina rai nian, osan iha, dentru prinsipiu ne’ebé iha Governu se de’it nia iha kbiit atu foti osan transfere tuir rejime duodésimu, agora rejime duodésimu lei ne’e iha hela, jestaun lei orsamentu 2017 mós iha hela fundu garantidu, tambasa mak lakohi uza, ne’e sira atu dada tempu hodi halo krize despeza ba Estadu ne’e, ne’e tanba la hatene lei, ukun nar-naran de’it, satán agora ne’e halo lei ida dehan duodésimu ne’e fulan rua de’it, se orsamentu jeral seidauk tama karik, duodésimu bainhira tan, ne’e la loos,”hateten deputadu bankada opozisaun ne’e.

Iha biban seluk, deputadu bankada CNRT, Patrocino Fernandes, hateten, VIII Governu aprezenta proposta hodi husu autorizasaun ba Parlamentu para foti osan ne’e, la’os atu fó sala Governasaun anterior, maibe kada Governasaun iha polítika diferente. Tanba ne’e, FRETILIN labele atu obriga Governasaun Aliansa Mudansa ba Progresu (AMP) hodi la’o tuir saida mak Governasaun FRETILIN halo ona iha VII Governu.

Hatan ba kestaun husi bankada opozisaun nian, Vise Ministra Planu Finansa, Sara Lobo, esplika, pedidu VIII Governu ne’e nesesariu tebes, tanba ne’e Governu husu Parlamentu atu bele prosesa ho urjente, tanba saldo atual 20 milloens USD la sufisiente atu estabiliza funsionamentu mákina Estadu.

“Ami husu atu atende ho urjente, tanba situasaun ne’ebé mak Ministériu Finansa enfrenta, iha difikuldade oi-oin atu bele asegrura pagamentu sira ne’ebé mak Governu tenke halo iha fulan ida ne’e nia laran, Governu iha obrigasoens atu selu, montante ne’ebé ami rekomenda 140 milloens USD, maibe 70 milloens USD atu uza uluk iha fulan Jullu nia laran, hodi selu saláriu vensimentu, pensaoens ba eis titular sira, ita mós iha obrigasoens atu selu pensaun ba Veteranu, iha mós despeza ba embaixada sira ne’ebé mak presiza atu selu rendas, maske ita hatene iha embaixada sira selu rendas la fulan-fulan, maibe ita tenke asegura kedas fulan  6 ka tinan 1 nia laran, ida ne’e despeza ne’ebé mak kategoria urjente duni atu bele atende, servisu hospitalares referais, liu-liu Hospital Nacional Guido Valadares, SAMES mós presiza atu liberta aimoruk sira ne’ebé mak iha periodu anterior halo importasaun ne’e presiza halo distribuisaun ba hospital sira, ita mós iha problema atu asegura kombustivel, tanba jerador iha Betano no Hera presiza selu empreza fornesedores kombustivel, ita mós iha kontratadu sira ba servisu fíziku ba projetu infra-estrutura, pagamentu ba ZEEMS, pagamentu salariu no bens servisu no bolseiru sira, ho razaun sira ne’e mak ministeriu finansa preokupa teb-tebes, tanba ne’e ami sujere para iha desizaun ruma ba ministeriu finansa atu bele hetan autorizasaun ba fundu petrolíferu hodi asumi pagamentu sira ne’e,”esplika Vise Ministra Sara Lobo.

Proposta lei refere, sei diskute no aprova iha jeneralidade no espesialidade liu hosi plenária iha Parlamentu Nasionál, hafoin lori ba Prezidente Repúblika atu promulga.Say


Banner

Foto

Notisia Ikus

MS: Posibilidade Governu sei aplika KO iha teritóriu nasionál

July 26, 2021
Ministra Saúde (MS), Odete Maria Freitas Belo, ...

UMDP husu PN retira proposta lei enkuadramentu OJF

July 23, 2021
Unidade Movimentu Demokrátiku no Patriotiku (UM...

L7 husu jerasaun foun aprende hamutuk ho jerasaun tuan

July 23, 2021
Veteranu Cornelio Gama ‘L7’ atúal deputadu ...

PM Taur: Polémika ró Tranship II, MTK mak responsabiliza

July 23, 2021
Primeiru Minstru (PM), Taur Matan Ruak, deklara,...

Lere kongratula Berta kandidata-an ba PR

July 22, 2021
Xefe Estadu Maior Jenerál Falintil Forsa Defeza...
1 2 3 620

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker