Vise Ministra Finansas, Sara Lobo Brites, lakohi fó informasaun klaru kona ba karaketerístika orsamentu duodésimu ba publiku, ho razaun prosesu sei la’o hela.
Hafoin enkontru ho Primeiru Ministru, Taur Matan Ruak, iha Palasiu Governu, Sara Lobo Brites, lakohi esplika detallu ba jornalista sira kona ba asuntu ne’ebé mak nia diskuti ho Primeiru Ministru.
Bainhira jornalista sira husu kona ba lala’ok orsamentu duodésimu, Sara Lobo hateten, asuntu ida ne’e sei iha hela prosesu nia laran.
“Ida ne’e sei iha prosesu nia laran hela, depois mak ita sei ko’alia loron rua ka tolu tan, tanba ita bo’ot sira hatene, tomada de posse segunda faze seidauk akontese, entaun seidauk to’o ida ne’e, to’o tempu ha’u sei informa ba ita bo’ot sira. Primeiru Ministru fó orientasaun normal de’it ba Ministériu Finansas para mantein servisu,”katak Sara Lobo ba jornalista sira iha Palasiu Governu, Kuarta (04/07).
Antes ne’e, deputada V lejislatura husi bankada CNRT, Fernanda Lay, hateten, VII Governu ne’ebé lidera husi eis Primeiru Ministru, Mari Alkatiri, foti osan husi fundu pertolíferu hodi uza ba orsamentu duodésimu illegal, tanba laiha koñesimentu husi Parlamentu Nasional.
Entretantu, eis Primeiru Ministru, Mari Alkatiri mós dezafia Parlamentu Nasional atu lori kazu ne’e ba Tribunal, karik aktu VII Governu nian ne’e illegal duni.
Entretantu tuir informasaun husi Diretor Ezekutivu Fundu Petrolíferu, Venancio Alves katak, Banco Central de Timor Leste halo ona transferensia milloens 70 dilar amerikanu husi fundu petrolíferu ba VII Governu utiliza hanesan orsamentu duodésimu iha fulan Maiu, tinan ne’e.
“Iha fulan Juñu foin lalais ne’e, Banco Central simu tan pedidu ida husi Governu atu halo tan transferensia milloens US$ 70, maibé ami Konsellu Administrasaun Bankco Central deside hodi kansela pedidu ne’e, tanba hela de’it loron rua Governu foun atu simu posse,”informa Venancio.cos
