Bankada Klibur Haburas Unidade Nasional Timor-Oan (KHUNTO) lamenta deklarasaun Amo Domingos Maubere nebe dehan lider maximu Partido KHUNTO, Jose dos Santos Naimori ‘Bukar’ ho ninia grupo halo ritual oi-oin hodi hasai ran ba ema hemu nee kontra dutrina igreja nian.
Segundu Vise Prezidente Parlamentu Nasional, Luis Roberto, iha ninia deklarasaun hatete KHUNTO seidauk kontra lei kanóniku ne’ebé kompostu husi Maromak nia ukun fuan 10 no igreja nia ukun fuan 5.
“Lei kanoniku iha ne’ebá hakerek hanesan ne’e só labele kontra Maromak nia ukunfuan 10 no igreja nia ukun fuan 5 ida ne’e mak lei kanóniku haruka ,tamba ne’e mak ami bankada KHUNTO lamenta tebes-tebes ho informasaun ne’ebé amu Domingos Maubere hatete liu husi media”, lamenta Luis Roberto, Tersa (30/06), iha Parlamentu Nasional.
Tuir Luis Roberto katak KHUNTO hari’i atu partisipa dezenvolvimentu no atu dezenvolve Timor ne’e ba oin ,laos atu destroi.
“KHUNTO nia prezensa atu konstroi ,laos destroi dinamika politika iha Timor mak la’o hanesan ne’e, ita labele interpreta tuir ita nia hakarak”, dehan Segundo vise PN.
Antes nee mos Sekretario Jeral Partido KHUNTO, Jose Agustinho da Silva hatete imajen nebe fó sai iha Media Sosial nee públiku intreperta labele ba buta seluk, maibe tenki hanoin ba positive nian.
“Ha’u husu para labele politiza kestoens sira nee, importante maka entidades hotu nia kolaborasaun maka kria situasaun ida nebe konduzivu, kolabora iha paz no estabilidade iha politika, estabilidade seguransa,,,”,hatete José Agustinho.GMN
