Bankada opozisaun Congresso Nacional da Reconstrução de Timor (CNRT) konsidera katak, Padre sira hanesan sidadaun Timor-Leste iha direitu tuir Konstituisaun Repúblika Demokrátika Timor-Leste (RDTL) garante, Padre sira livre atu koalia saida mak sira hanoin diak ba sarani no ba Nasaun ida ne’e.
“Igreja iha situasaun balun ne’ebé presiza sira atu koalia hodi defende sira nia sarani no koalia diak ba sarani sira”,Vise Xefe Bankada CNRT, Patrocínio Fernandes, hato’o asuntu ne’e ba jornalista sira, Kinta (16/07/2020) iha Parlamentu Nasionál, relasiona deklarasaun padre Domingos Maubere, ne’ebé konsidera Naimori ho nia grupu halo juramentu hemu ran ne’e kontra doutrina igreja no hetan reasaun hosi Konselleiru másimu KHUNTO, Jose dos Santos “Naimori Bukar” ne’ebé deklara hakarak debate ho parte igreja.
Vise Xefe Bankada CNRT ne’e haktuir, igreja nia kna’ar mak atu lori sarani sira ba tuir doutrina, ne’ebé igreja hanorin, tanba ne’e bainhira igreja haree movimentu sira hanesan agora fó ameasa ba vida sarani ni'an, igreja iha obrigasaun atu koalia.
“Ha’u lakoi mete to’o iha deklarasaun bankada Khunto ni'an, maibé husi ami nia haree igreja iha responsabilidade atu haree iha movimentu balun ameasa vida sarani, sira iha direitu atu koalia. Omilia parte padre sira buka atu sensibiliza sarani sira atu lao tuir doutrina, ne’ebé laiha sala ida kona-ba padre sira nia omilia”, hatutan deputadu Patrocínio.
Iha fatin hanesan, Vise Xefe Bankada PLP, Franscisco de Vasconcelhos, hatete deklarasaun polítika hosi Khunto kona-ba padre sira hasai batina halo polítika, liafuan ida ne’ebé dezde uluk ema koalia, bainhira igreja tama iha área sira liga ho politika.
“Iha biblia dehan katak, ida ne’ebé Jesus ni'an ba Jesus, ida ne’ebé Cesar ni'an ba Cesar ni'an, ida ne’e signifika ita labele kahur sasan, maibé deklarasaun Khunto ni'an bazea ba públiku nia koalia liga ho juramentu no atividade sira seluk ne’ebé igreja konsidera hanesan, kontra doutrina igreja ni'an, nune’e igreja mós deklara nia pozisaun”, haktuir deputadu PLP ne'e.
Vise Xefe Bankada PLP realsa, bainhira atu krítika partidu balun ita tenke haree ba estatutu partidu ni'an, sera que estatutu partidu nia'n ba se de'it mak tama iha Khunto tenke halo juramentu, tanba lei partidu politiku la koalia klaru ba ida ne’e.
Tanba Timor-Leste Estadu direitu demokrátiku, dahuluk ita koalia refere ba lei partidu politiku no estatutu partidu ni'an atu regula, saida mak partidu bele halo no saida mak sira labele halo ida ne’e iha nanis ona.
“Ita hakarak tau sasan iha nia fatin, ita tenke haree lei partidu ni'an, artigu sira la bandu partidu politiku labele halo juramentu, maibé husi pontu de vista igreja ni'an katak, partidu ne’ebé uza simbolu igreja kontra igreja, ida ne’e partidu Khunto mak bele hatan ba kestaun ida ne’e,” tenik nia. Fel
