Sekretária Jerál (SekJer) Parlamentu Nasionál (PN), Cedelizia Faria dos Santos, hateten, PN simu ona Dotasaun Orsamentu Temporáriu (DOT) ba fulan Jullu ho montante USD millaun 1.5.
Ho DOT fulan Juñu ne’ebé aloka ba viajen lokal ki’ik, difikulta komisaun sira atu halo fiskalizasaun iha munisípiu sira, tanba ne’e, kada komisaun sira iha PN fulan ida halo fiskalizasaun dala ida de’it.
“Tanba ne’e, DOT ba fulan Juñu PN ezekuta de’it 61%, tanba agora fulan Jullu, ami PN ezekuta de’it 61%, razaun la ezekuta orsamentu ba viajen estranjeiru, tanba ita iha situasaun COVID-19“, SekJer PN ba jornalista sira iha PN, Tersa (14-07-2020).
Nia esplika, DOT ba fualn Jullu ne’ebé simu husi Ministériu finansas (MF) iha semana kotuk aloka ba subsídiu mensal ba deputadu sira, inklui manutensaun ba transporte.
“Iha Sesta semana kotuk PN simu ona DOT ba fulan Jullu ni’an ho montante USD 1.5, maibé bai-bain mensalmente PN simu USD1.2, maibé fulan Jullu, ita boot sira hatene atu halo pagamentu subsídiu ba deputadu sira, ami iha difikuldade ho montante ne’ebé maka ki’ik loos”, tenik Cedelizia.
Cedelizia mós informa, DOT fulan Juñu ba PN ho montante USD tokon 1.2 ne’e PN konsege ezekuta de’it ho pursentu 61. ety
