Prezidente Parlamentu Nasionál (PPN), Aniceto Longuinhos Guterres Lopes, informa, serimónia hatúr hikas meza Prezidénsia ne'ebé planeia ona ba loron 30, fulan Agostu, tinan ne'e, seidauk serteza, tanba prosesu produsaun meza seidauk hotu, inklui tempu ba deputadu sira halo resesu.
"Resesu hahú dia 31 de Jullu, hanesan bai-bain sesaun lejislativa hahú fali iha 15 de Setembru, depois meza foun agora sei iha prosesu hela, meza seidauk hotu, ne'e duni maske marka tiha ona data, maibe ha’u sei altera", hateten Aniceto Guterres, ba jornalista sira iha Parlamentu Nasionál (PN), Kuarta (15/07/2020).
Kona-bá deputadu sira komisaun permanente ne'ebé foin hili, PPN ne'e, informa, komisaun refere seidauk funsiona, tanba ne’e nia parte lakohi adianta servisu komisaun permanente nia ba oin.
Antes ne’e, liu husi reuniaun líder bankada deside ona atu hatúr meza Prezidente foun ne’ebé iha selebrasaun loron konsulta populár 30 de Agostu, maibe posibilidade sei altera fiksu data refere.
Meza Prezidente PN ne'e naksobu iha loron 18, fulan Maiu, tinan 2020 ne'e, bainhira deputadu bankada CNRT, FRETILIN, KHUNTO ho PLP hadau malu no satán malu, bainhira Vise Preizdente PN, Maria Angelina Sarmento atu prezide plenária hodi aprova karta destituisaun ba eis PPN, Arão Noe Amaral husi bankada CNRT, hodi hili Prezidente foun Aniceto Guterres Lopes husi bankada FRETILIN.
Prolonga funsionamentu normal Parlamentu ne’e, sei diskute iha plenária semana oin, entretantu resesu ba membru Parlamentu hahú iha loron 31, fulan Jullu no sesaun lejislativa sei hahú fila-fali iha loron 15, fulan Setembru, tinan ne’e. Say
