VIII Governu liu husi reuniaun Konsellu Ministru (KM) ne'ebé lidera husi Primeiru Ministru (PM), Taur Matan Ruak, Kuarta (8/7/2020), ezonera ona Prezidente Timor Gas And Petroleum (GAP), EP, Francisco da Costa Monteiro no nomeia fali António José Loiola de Sousa ba asume fali kargu refere.
Iha reuniaun Konsellu Ministru (KM) ne'e aprova projetu deliberasaun, ne'ebé ho objetivu halo ezonerasaun ba Francisco da Costa Monteiro, husi kargu Prezidente Konsellu Administrasaun Timor GAP-Timor Gas & Petroleum, E.P no ba kargu Prezidente Diresaun Ezekutiva no aprova hodi nomeia António José Loiola de Sousa ba kargu refere.
“KM halo ezonerasaun ba Prezidente Timor Gas And Petroleum (GAP), EP, Francisco da Costa Monteiro no KM mos aprova nomeasaun ba António José Loiola de Sousa ba kargu refere, nune’e António José Loiola de Sousa hanesan Prezidente ba Konsellu Administrasaun Timor GAP no Prezidente ba Diresaun Ezekutiva Timor GAP, EP ni'an”, dehan Ministru Prezidensia Konsellu Ministru (MPKM), Fidelis Magalhães ba jornalista sira iha Palásiu Governu. GMN
