GMN TV Politika Luis Roberto rejeita membru PNTL balun halo juramentu ba KHUNTO

Luis Roberto rejeita membru PNTL balun halo juramentu ba KHUNTO

0 views

Deputadu bankada KHUNTO, Luis Roberto da Silva, liu husi deklarasaun bankada nian iha plenária semana ne’e, rejeita deklarasaun Komandante Jerál Polisia Nasional Timor-Leste (PNTL), Komisariu Faustino da Costa, ne’ebé deskonfia membru PNTL balun envolve iha partidu no halo juramentu ba partidu.

Bankada KHUNTO mós lamenta no konsidera katak komisáriu PNTL viola direitu sidadaun komum nian.

“Bankada Khunto la aseita ho deklarasaun Komisáriu PNTL ne’e katak la loos, no atu katak, la’os hanesan polísia mak halo juramentu ba partidu, maibé hanesan sidadaun komum ida ne’ebé mak nia nasionalidade Timorense, iha direitu atu eskolla kór partidu ida ba tuir nia vontade rasik, tuir KRDTL artigu 46 nú 2, katak sidadaun hot-hotu iha direitu atu partisipa iha vida polítika”, deputadu Luis Roberto, deklara asuntu ne’e liuhosi deklarasaun bankada, iha plenária, Tersa (07/072020).

Maibé haree ba dekretu governu númeru 9/2009 no lei órganika PNTL nian katak, ajente polisial hotu so kumpri de’it ba lei inan, maibé iha dekretu lei no lei órganika refere laiha artigu ruma, kestiona no bandu oknum ruma nia direitu eskolla kór partidu ida.

Tanba ne’e Khunto solisita ba komando PNTL, atu hatudu neutralidade iha Komando Jerál PNTL, atu bele asegura prinsipíu interdependensia ba malu.

Vise prezidente Partidu Khunto ne’e esplika, prosesu juramentu ne’ebé partidu Khunto iha, hanesan tradisaun ida, hodi kesi-metin ema hirak ne’ebé envolve iha partidu Khunto, nu’udar maun-alin, iha aman ida no inan ida partidu Khunto nian to’o mate.

Alende ne’e, xefe bankada CNRT, Duarte Nunes sujere parte igreja ho líder partidu tuur hamutuk, hodi diskute no esplika ba malu, hodi bele intende malu, nune’e labele mosu dúvidas tan.

“Se ita kompara nu’udar bibi atan, ema sira ne’ebe tuir KHUNTO ne’e maioria ema Katóliku, maibé la hatene Katóliku hotu ka lae, se Katóliku ne’e igreja mak kontrola”, haklean deputadu Duarte Nunes.

Tanba ne’e, bainhira haree ema Katoliku ruma tama fali iha situasaun ida ne’ebé sira haree la di’ak, padre sira tenke ko’alia, atu lideransa partidu Khunto mós intende situasaun padre sira ni'an.

“Ema bibi atan ida, Kuandu haree nia bibi oan ida halai, nia tenke hakilar, nia tenke hatete no atu ba ne’ebé, ne’e para buka dalan loos, maibé krítika malu no ameasa malu ne’e, ita sei la lori rai ne’e ba oin”, afirma deputadu CNRT ne’e.

Nia dehan, kuandu iha kontradisaun líder Khunto halo halo aproximasaun ba igreja no tenta esplika saida mak la diak tuir igreja nia hanoin, para depois iha intendimentu ida.

Kona-bá deskonfia membru PNTL balun envolve iha iha partidu, deputadu opozisaun ne’e hateten, tenke hasai hosi nia funsaun, bainhira identifika, tanba laiha dalan ba PNTL ho F-FDTL atu envolve iha partidu, maske iha direitu ba vota.

“Iha parte ida ha’u bele konkorda, katak ema hotu iha direitu atu vota ba partidu ida, maibé ne’e bainhira ba vota, enkuantu nia hanesan Polísia ka F-FDTL nia labele tama partidu ida, ne’e konstituisaun la fó dalan para F-FDTL ka PNTL ida atu tama iha partidu.

Tanba nia dehan, se iha duni tenke investiga no hasai tiha nia, hasai tiha membru ne’e, hodi fó opsaun hili partidu ou hili forsa, buat rua ne’e tenke klaru, ne’e para labele hamosu situasaun ne’ebé mosu, no duun malu ba mai.

Antes ne’e, mosu krítiku oioin iha públiku, liu-liu média sosial facebook, kona-bá lalaok juramentu ne’ebé partidu Khunto halo.

Maibé Konsellu Másimu Partidu KHUNTO, Jóse dos Santos Naimori hateten ona katak, nia parte admira, foin mak mosu krítiku oi-oin iha públiku, hafoin partidu eziste tinan barak ona, nune’e nia parte konsidera la’os buat foun ne’ebé halo ema hakfodak. Say


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker