Primeiru Ministru nudar mos Ministru Interior (MI), Taur Matan Ruak, husu pesoál migrasaun sira tenke servisu ho kuidadu, atu nune’e sidadaun ne’ebé tama mai Timor-Leste, presiza kumpri regra ne’ebé mak iha.
“Agradese ba familia Ministériu Interior, ha’u promete katak sei servisu hamutuk ho Komisariu PNTL, hodi haree dalan oinsa bele ultrapasa ita nia problema, ne’ebé ita iha la’os ituan, maibé, problema ida ne’e hanesan oportunidade ida atu ita hadia avansa ba oin nafatin,” afirma, Primeiru Ministru no Ministru Interior, Taur Matan Ruak, iha edifísiu Ministériu Interior, Tersa (30/06/20200).
Governante ne’e esplika, servisu migrasaun importante tebes ba rai ida ne’e, liu-liu kontrola ema ne’ebé tama sai husi fronteira.
“Dalaruma ita loke ita nia odamatan fasil tebes ema atu tama mai, derepenti ita hakfodak liu ona, problema saida mak akontese iha ne’eba, lutu mak kuak ka, ita bo’ot sira hein ita nia odamatan kuidadu ho ida ne’e, ne’e importante atu ema ne’ebé mai presiza kumpri regras atu nune’e sira bele rekoñese katak nasaun ne’e iha nain,” deklara, Ministru Interior Taur Matan Ruak.
Iha fatin hanesan, Ministru Interior Interinu Sesante, Filomeno Paixão, konsidera servisu migrasaun todan, no iha preokupasaun barak tamba ne’e, husu Ministru Interior atu tau atensaun ba dezafius hirak ne’e.
“Parte migrasaun servisu ida ne’ebé todan no preokupasaun barak, la’os deit to’o iha ha’u, maibé to’o iha PM, ita halo reforma dala uluk komesa ho dijitalizasaun, atu bele implementa 2017, durante ne’e ita kahur lei rua 2003 no 2017,” afirma, Ministru Defeza Filomeno.
Ministru Defeza ne’e esplika, lei 2017 atu implementa iha totalidade ladiak tamba, falta dijitalizasaun ne’ebé mak foin dada’uk ne’e implementa, dadaun ne’e foin 50% tamba situasaun COVID-19 difikulta akizasaun sasan mai husi rai liur.
“Ha’u kongratula ba servisu migrasaun ne’ebé halo servisu ho profesionál, no konsege akompaña dijitalizasaun ne’ebé la’o hela, nune’e bele fó tempu ita tau adidu seguransa iha rai liur, bele hamos ema ne’ebé atu tama mai, ita bele hatene ona nia objetivu mai TL halo saida,”hatete, Ministru Defeza ne’e. Cin
