Xefe bankada Kmanek Haburas Unidade Nasionál Timor Oan (KHUNTO), deputada Olinda Guterres, haktuir, deputadu KHUNTO na’in lima iha Parlamentu Nasionál (PN) simu ona orientasaun, atu labele ko’alia kontra líder igreja Katólika tan, inklui sidadaun hotu, no ko’alia de’it ba interese povu nian iha uma fukun.
Olinda transmite katak, deputadu bankada KHUNTO sira labele responde kualker deklarasaun husi públiku, nune’e konsentra de’it ba povu nia preokupasaun, nu’udar reprezentante povu.
“Ami respeitu ami nia konselleiru nia desizaun ne’ebé hatún mai ami, dehan katak ami na’in 5 mai túr iha ne’e, labele ko’alia kona-bá ita-nia igreja, liu-liu ba Padre sira ami labele ko’alia tan, husik bá se mak atu ko’alia ami, ko’alia de’it bá, maibe ami labele ko’alia tan”, deklara Xefe bankada KHUNTO ne’e ba jornalista sira iha PN, Sesta (17/07/2020).
Alende ne’e, Olinda mós afirma tan, maske deputadu KHUNTO balun konsege hasai deklarasaun balu hasoru padre sira, maibe ba oin sei la ko’alia tan, maske mosu krítiku oi-oin iha públiku, tanba orientasaun hosi superior Khunto nian.
“Ami sei ko’alia de’it mak povu nia aspirasaun, ne’e orientasaun husi ami nia konselleiru, katak ami labele ko’alia hasoru ita nia igreja, maibe antes ne’e igreja mak ko’alia uluk ami mak Vise PN, (Luis Roberto) hatán duni, maibe la’os ko’alia aat Padre sira”, tenik Olinda Guterres.
Nia haktuir, konselleiru la autoriza membru Parlamentu Nasional KHUNTO nian atu labele ko’alia hasoru parte ne’ebé de’it kona-ba asuntu refere.
Antes ne’e, mosu polémika iha públiku, entre partidu KHUNTO hasoru igreja Katólika, tanba meius ka dalan juramentu ne’ebé Khunto halo, antes tama partidu sai hanesan militante ba partidu KHUNTO.
Relasiona ho polémika sira ne’e, Konselleiru superior partidu KHUNTO, Jose dos Santos Naimori mós esplika lala’ok partidu KHUNTO nian, no husu ona deskulpa ba igreja Katólika, ba deklarasaun hotu ne’ebé deputadu KHUNTO halo. Say
