Xefe Bankada KHUNTO, Olinda Guterres, kestiona pontualidade deputadu sira ni’an iha Parlamentu Nasionál (PN), tanba tuir ajenda ne’ebé aprova iha reuniaun líder bankada katak, iha loron Segunda no Tersa, deputadu sira hahú hala’o plenária iha tuku 09:00 dader, maibé realidade deputadu sira hahú fali plenária besik tuku 10:00.
Tanba ne’e, bankada KHUNTO foti desizaun úniku no husu ba Prezidente PN, Aniceto Guterres katak, bainhira oras to’o no priense ona kuorum mak realiza plenária.
“Maluk sira ne’ebé mak la marka prezensa naran katak bankada Governu priense kuorum ita tuir de’it, ha’u hanoin ida ne’e mak loos“, reprezentante povu ne’e liu husi plenária iha Parlamentu Nasionál (PN), Tersa (30-06-2020).
Hatan ba kestaun ne’e, Prezidente PN, Aniceto Guterres, hateten, kona-bá pontualidade husi deputadu sira ni’an meza sei haree fali iha reuniaun líder bankada sira.
“Ita haree deputadu Cornelio Gama “L7” ema veteranu sempre fó hanoin mai ita dalabarak ona, maibé kestaun ida ne’e meza sei trata hamutuk líder bankada iha iha konferénsia líder bankada”, tenik Prezidente PN ne’e.
Entretantu tuir rejimentu PN artigu 10 ne’ebé koalia kona-bá dever deputadu sira ni’an hateten, deputadu sira tenke iha pontualidade, hodi partisipa iha plenária no reuniaun komisaun sira. ety
