Prezidente komisaun G iha Parlamentu Nasionál (PN), António Verdiál, hateten, ho orsamentu USD tokon 2 ba Universidade Nasionál Timor Lorosa’e (UNTL), ne’e sei difikulta ninia prosesu aprendizajen no aktividade sira seluk universidade nini’an.
“Hanesan reprezentante povu ita tenke rona no tenke simu sira nia ideia sira ne’e, tenke fó apoiu polítiku, maibé husu ba Reitór UNTL tenke halo kooperasaun di’ak ho Ministériu Ensinu Superior, tanba UNTL universidade Estadu ni’an”, Prezidente komisaun G iha PN ne’e ba GMN, hafoin hala’o audénsia ho Reitor UNTL hamutuk ho ninia estrutura iha iha PN, Kinta (23-07-2020).
António akresenta, antes ne’e Governu apoiu orsamentu ba UNTL USD tokon 4, maibé ohin loron Governu halo tiha redusaun iha ne’ebé fó de’it USD tokon 2 ba universidade.
Tanba ne’e, António Verdiál lori naran komisaun G husu ba Reitor UNTL, atu halo aprosimasaun ho Ministériu Ensinu Supeior, atu hadi’a sira nia planu iha Orsamentu Jerál Estadu (OJE).
“Komisaun G ezekuta de’it hodi bele atende Reitor UNTL nia prezensa, sira mai fó sira nia opiniaun atu husu apoiu polítiku PN atu haree sira nia nesesidade ne’ebé sira ezije, hodi bele UNTL bele hala’o funsionamentu ho di’ak liu tan iha future”, tenik Prezidente komisaun G iha PN ne’e.
Tuir ajenda, Governu sei aprezenta OJE tinan 2020 iha fulan Setembru no OJE ba tinan 2021 iha fulan Outubru. ety
