Konselleiru máximu partidu Kmanek Haburas Unidade Nasional Timor Oan (KHUNTO), José dos Santos Naimori Bukar, hatete, iha selebrasaun aniversáriu KHUNTO nianian ba dala sia, nia hakarak Partidu KHUNTO sai autór ba paz no estabilidade hanesan hatudu hela dadauk ona.
Tuir Naimori, durante ne’e KHUNTO sai ona hanesan autór ba paz no estabilidade iha nasaun Timor-Leste atu bele lori dsezenvolvimentu ba nasaun.
“Uluk ema dehan Naimori ne’e kriminozu ha’u dehan ida ne’e ha’u sei haluha iha loron ida, ha’u sei halo ida úniku fali iha Timor Leste, katak Naimori la’os kriminozu hanesan ita bo’ot hatete, ha’u lori KHUNTO sai autor ba paz no autór ba dezenvolvimentu, autór ba povu nia moris diak ida ne’e mak ha’u koko atu halo. Ema ne’ebé hakarak sai servidór, tenke halo polítika tenke koalia polítika para kompriende atu lori povu ne’e ba moris diak, ida ne’e mak hakarak halo polítika, polítika la bele iha interese hanoin deit mak hakarak sai bo’ot, hanoin deit mak hakarak kaer projetu ne’e lalos, halo polítika hodi defende Nasaun ida ne’e, defende povu nia díreitu atu ba moris diak”,dehan Naimor Bukar ba Jornalista sira Sábadu (5/07/2020) iha Postu Administrativu Ainaro Vila, Munisípiu Ainaro.
Nia subliña, ema hotu-hotu koko atu sai líderansa, maibe sai líderansa la fasil, líderansa la’os mehi, líderansa la’os haree husi matenek, líderansa la’os haree husi nia riku, husi isin boot no matenek, maibe líderansa haree husi hahalok rasik, maka sai líderansa ne’ebé ema atu respeita no hanai.
Prezedente Partidu KHUNTO, Armanda Berta dos Santos, mos haktuir, importante tebes hodi fo hanoin mai ema hotu katak oinsa mosu partidu KHUNTO hodi serví tane rai, ema no lisan, tuir filozofia partidu KHUNTO ninian.
Armanda subliña, konstrusaun nasaun hanesan servisu ida ne’ebé todan no difisil, maske todan no difisil maibe eroi no líder istóriku sira, konsege duni harii nasaun Timor-Leste iha mundu internasionál nia matan.
“Partidu KHUNTO, liu husi nia vizaun misaun, hakarak harii sosiedade foun ida ho justisa, hakarak ema hotu moris iha igualidade sosial, paz, solidariedade ekonomia sustentanvel, hakarak fo kontribuisaun ba komunidade, para moris iha independensia iha área ekonomia no sosial”,hakotu Armanda. Oly
