Membru VIII Governu, Kuarta (15/07), debate kestaun sira relasionadu ho planeamentu, monitorizasaun, avaliasaun no orsamentu husi programa sira Governu nian, hodi kontinua hadia kualidade planu no orsamentu Governu nian. Enkontru ne’e hanesan maneira ida atu alkansa ezekusaun ba orsamentu Estadu ho efisiente no efikaz aliñadu ho prioridade no programa Governu nian.
“Enkontru ida ne’e hanesan retiru ida ne’ebé konta ho prezensa Primeiru Ministru (PM), Taur Matan Ruak no membru Governu sira hotu hodi rona aprezentasaun sira husi Unidade Planeamentu Monitorizasaun no Avaliasaun (UPMA) ne’ebé mak hato’o ba membru Governu sira, ida ne’e importante tebes ba membru Governu foun sira. Entaun sira (UPMA) aprezenta sira nia servisu no lala'ok ne’ebé iha no esforsu hirak ne’ebé halo tiha ona, liu-liu kona-ba planeamentu monitorizasaun no avaliasaun no prosesu sira hodi produz livru orsamentu nian”, dehan Ministru Prezidensia Konsellu Ministru (MPKM), Fedélis Manuel Leite Magalhães iha salaun Ministériu Finansas.
Iha reuniaun ne’e membru Governu sira diskute mos prosesu no prosedimentu sira husi Sistema Nasional Aprovizionamentu. Além de ne’e governante sira mos debate mos kona-ba sistema no instrumente-government ne’ebé ho nia objetivu atu aproxima sidadaun sira ba Administrasaun Públika, liu husi dezenvolvimentu governasaun eletrónika no modernizasaun administrativa husi servisu públiku sira.
Enkontru ne’e hanesan retiru ba daruak entre membru Governu sira hafoin estrutura ezekutivu nian kompleta tiha iha loron 24, fulan Juñu liu bá. Antes ne’e, iha loron 26 to’o 27, fulan kotuk, Oitavu Governu halo ona retiru ba dahuluk hodi debate prioridade sira ne’ebé sei implementa to’o tinan 2023, ne’ebé sei reflete iha Orsamentu Jeral Estadu. oct
